دیدرگین آرزیلار، كوهنه ديلك لر
آخير گوزلريمدن ياش عوضينه
قارا خاطيره لر، پوزغون دويغولار
قونور اورگيمه قوش عوضينه
شام كيمي آغ آپباغ سحره ساري
يانيرام هر آخشام هر گئجه ياري
آي ائللر بو خالقين طالعين باري
وارلیغیمیز گیله گیله موما دونور
من یانیرام
سن یانیرسان
امما یئنه
قارا وطن ایشیقلانمیر.
بهمنین اون دوردو/ صوبح ساحات ایکی اوتوز دوققوز دقیقه/ تبریز / الهیه
یادیما دوشورسن هر آخشام چاغی
سوزالمیش بنووشه یارپاقی کیمی
یادیما دوشورسن آغری آجی دان
یانان اوره گیمین اوجاقی کیمی
قدیم کی ایللر تک اوره گیم یانیر
یادیما دوشنده ظریف اللرین
کئچمیش لر گوزومده بیر بیر اویانیر
هله اوره گیمده گوینه ییر یئرین
یئنه معصوم باخیر گوزلرین بئله
قاراداغین اولکر مارالی کیمی
دوداغین گولسه ده هردن بیر کره
اوره گین ویرنیخیر یارالی کیمی
جاوان کن قوجالان سولموش یاناقدا
کوهنه بیر سئوگی نین توزو قالیبدیر
رنگین ده ییشسه ده مین مین بویاقلار
ساچیندا الیمین ایزی قالیبدیر
او یورغون باخیشین یورغون نفسین
منه ایلک عشقیمی حیکایت ائیلر
نئی کیمی اینله ییب اوخشایان سه سین
قارا طالعیندن شیکایت ائیلر
هله ده عشقین لا اوره گیم دویور
یاندیریر جانیما جومان آیریلیق
مین بیر انیلتی ایله گوزلرین دئییر
آیریلیق آیریلیق آمان آیریلیق
یادیما دوشورسن هر آخشام چاغی
آنام باجیم کیمی قارداشیم کیمی
سیر ائویم سیر یئریم سیرداشیم کیمی
یولومدا جان آتان یولداشیم کیمی
اود توتوب اوره گیم یانیر یئنه ده
آیریلیق آیریلیق آمان آیریلیق
یادیما دوشورسن هر آخشام چاغی
كنديميزه قيش چوكوبدور
كنديميزه قيش چوكوبدور، هاوا سويوق آرا سرين
باسيليب ياز، سوسولوب ساز، حكيم لر آز، يارا درين
باهار ايچون قلينج چكيب جاندان كئچن ارن لرين
مزارلاري باهار ايچره قاليبدير قار تاپداغيندا
-
چيچه ك چيچه ك سولان كنديم يارپاق يارپاق ساراليبدير
پنجره ني خزان ووروب گونش ائوده قاراليبدير
وارليغيميز ديلك اولوب اوزاقلاردا يئر آليبدير
طالع سوسور ديغه ديغه بوش آرزيلار تاپداغيندا
-
كنديميزه قيش چوكوبدور آل گونشي چن پيله يير
فلاكتين اوجاغيندان تونقال تونقال قار اله يير
بيزيم ده بو پير آغاجين اوز ايچينين قوردو يئيير
اوره گيميز پيلته لنيز دونموش ايلقار تاپداغيندا
-
كنديميزه قيش چوكوبدور ياتيب ذيروه سي ياماجي
قار ياغالي قارا گئييب تورپاغيمين هر قاريجي
تاريخ لرين آشناسي ييق بيزلر ايله دار آغاجي
بو بيرينجي دفعه دئييل قاليريق دار تاپداغيندا
-
كنديميزه قيش چوكوبدور قارلار آغير بوداق سينيق
قيشيميزا باهار دئييب سئوينمه يه چاليشيريق
بيلمه ك گوناه، قانماق اولوم، حقيقتين مولكو قوروق
دوشونجه لر سيخيليبدير زيندانين دار تاپداغيندا
-
"يورغون"اولدوم عومروم بويو يانديغيم چوخ ياتديغيم آز
بير اليمده ايتي قلم بير اليمده يانيقلي ساز
هر نفسيم اولدو هاراي هر انداميم اولدو بوغاز
سه سيم باتدي عدالتين ازلدن كار تاپداغيندا
تبريز 12/12/77
ائله دوزوملو یه م آغری آجی یا
اوره ییم دمیر دی داشدی دئییرسن
دوزوره م دینمیرم درده یارایا
گونلریم آنلاریم خوشدو دئییرسن
بیر یورغون یولچویام گزدیگیم هدر
دایانیب دورموشام سن منده ن بتر
دئییرم تلسمه بو گون ده کئچر
تله سن عومور دو یاشدی دئییرسن
یاندیردی عشقین جانیمی تدبیر قیل تدبیر قیل
زولفونله رام ائت کونلومو زنجیر قیل زنجیر قیل
محراب قاشین مسجد گوزون کیپریک مصلی لر صفی
خالین موذن دیر دئنن تکبیر قیل تکبیر قیل
صوم و صلاتیندان کئچیب حوسن ایختیار ائتمیش کونول
یارب گئدیر الدن دینیم تقدیر قیل تقدیر قیل
آیات حق دیر مو به مو اول کفر زولفوندن گلن
ای شانه بیر بیر صبر ایله تفسیر قیل تفسیر قیل
قوی سینه م اولسون لوح عشق ائت تیر موژگانین قلم
کاتیب اورل قانیله گل تقریر قیل تقریر قیل
مست اولموشام کئفلنمیشم یوخ آللاهیم یوخ مذهبیم
داشلا منی چک چارمیخا تکفیر قیل تکفیر قیل
منده غزلسيزله ميشه م
كيپريگين اكديگي باغريم يئري قانقال بيتيرير
سئوگي خرمنگاهي دير بيرده گوزلسيزله ميشه م
داش اوره كلرده قورولموشسا منيم سئوگي قالام
اودا لاخلير اياق آلتيندا تملسيزله ميشه م
باخيرام هر ائوه بير چارچيوا قاش گئت توكولور
بو تانيش سيز كوچه لرده نئجه گلسيزله ميشه م
دردو غم قيرتليغي دير دوز بو غزلسيزليگيمه
گوزليم منده نه مدت دي غزلسيزله ميشه م
سنسيزله ييره م
قيشين آغ كوركونه بير سيلسيله قان دامجي لاييب
اووچو قاچميشسادا من قار چيچه گين ايزله ييره م
بو گونون بوش سوووشان آنلارينا سويكه نه ره ك
صاباحين قان دولو نيكبت گونشين گوزله ييره م
اولو تاريخ ديري نسلين اوزونه نيفرت ائدير
باشقا سوز تاپماييب آنجاق اوزومو گيزله ييره م
بو گونون آل قفسينده ن قيريرام عشق كوكون
گئديره م كئچميشيمه اوندا دا سنسيزله ييره م
15/6/79 تبريز
قضانين تقديرين قيرميشام ايپين
اوزوم ياراتديقيم گونو ياشيرام
ديله كده ن اوره گه جمالدان جانا
كومور آپاريرام اوجاق داشيرام
نامحرم عشقه ياد بير سئوگي يه
اويدوقجان داها دا حالال لاشيرام
سن اي مسلك آدلي قبيرده ياتان
اويان اوره گيمين مجنون سه سينه
سيزقا آرخ دئييله م كردي دولانام
دلي يه م دولويام دنيزجه سينه
-
تانيري ني بويودوب قورخوتما مني
تانري بير چيچه كدير اليمده منيم
ايسته سه م قيزينار اوره گيم ايچره
كول اولار آهيمدا كولومده منيم
ايسته سه م اوتورار به بكلريمده
بوغولار چاييمدا سئليمده منيم
آز كوهنه بير سوزون باشينا دولان
گل منده كونول وئر حق جيلوه سينه
ديري يه م دورويام بير تانري كيمي
دلي يه م دولويام دنيزجه سينه
-
دايانيب دوراندان اوره ك سه سينه
منده بو خيلقتين بير آللاهي يام
منيم له جان دورور دنيز اوينايير
من بو يارانيشين يانان آهي يام
نينيره م قول اولوم هر گول اوزلويه
اونسوز دا دونيامين پاديشاهي يام
اوره گيم دويونور معجزه كيمي
سينادير منادير منده كي سينه
ايچه ريم بوش دئييل بير كاسا كيمي
دلي يه م دولويام دنيزجه سينه
9/1/82 تهران
يانيق كرم
ال اته يه چوره چوپه ايله آيا گوز يومورام
ساحات دورور زامان قالير
تكرار اولور يالنيز بير آن
سونسوز اولان بير فضا دير
بير من وارام بير ده سازيم
من تانري ني آختاريرام
جانيم يانير گوزوم جومور فضا بويدا
يئنه چولده ياغيش ياغير من چاليرام يانيق كرم
-
من گزديگيم بو فضا يه اوجاليب مي كيمسه گوره ن؟
تانري سه سي اوفولدايير
كوله ك دوروب
سه س دايانيب
نور سنين له ده ييشيلير
نه دنيز وار نه شلاله نه داغ نه باغ نه گول نه قار
آلدانماقا هئيچ گوزه لليك ديكه لمه ييب گوز اونونه
بير قارانليق سونسوز فضا
بيرده سوسوز بيراوره كدي
نه قاپي وار تاققيلداديب او هاردادي سوروشاسان
نه تورپاق وار ايزي دوشه
نه مكان وار آختاراسان
نه زامان وار گزديگيني ايپه دوزه
هئچ زاد يوخدور
سونسوز اولان بير فضا دير
سانكي تانري دير هونكورور
دئييرسن بس يانيق كرم
زمان ايچره، مكان ايچره داردا قالان
اوزون اينتظاردا قالان
سئوگي سينده ن، سئوداسيندان، آللاهيندان آيري دوشموش
بشرين مرثيه سي دير
اينسانين اوخشاماسي دير
يانيق كرم بلكه منيم تانريمين آغلاماسي دير
يانيق كرم خلقتين اينتهاسي دير
يانيق كرم خلقتين ابتداسي دير
يئنه يئر گوي سه سه گليب
ياندي كرم
ياندي كرم
يئنه يئر گوي اوفولدايير
گوي كيشنه يير
بولود آغلير
ني مه له يير
تار گوينه يير
قوپوز دئيير بودا مني، دوي مني
كرم دئيير اوزان كيمي دوي مني
تئل يانديرير سئحيرلنميش دويمه ني
بو خيلقتده گوناها باخ آي آللاه
قوپوز يانير، گوز آغلايير سئل گلير
كرم يانير اللريمده كول گلير
ناكام بير توي گوروشونه ائل گلير
آچيلمايان صاباحا باخ آي آللاه
قوپوز يانير، كامان يانير، تار يانير
ناله سيني دينله مه ميش كار يانير
ارزرومدا له له لنميش قار يانير
اود اله يه ن پناها باخ آي آللاه
بوردا يانان بير خلقتين كولودور
بوردا يانان بير تانري نين الي دير
بو كرم دير، سئوگي نين تملي دير
كوله دونه ن آللاها باخ آي آللاه
يانير كرم
يانير له له
يانير دنيز
يانير بولاق
يانير پاليد آغاجلاري
يانير كوتان
يانير اينك
يانير آلما
يانير هيوا
يئنه داغلار پارچالانير
داش يئري يير
قايا اوچور
آخير خلقت داماريندا
كرم كولو،
آخير خلقت اوجاقيندا
كرم قاني
كووره لميشه م دلي دلي
يئنه چولده ياغيش ياغير من چاليرام يانيق كرم
-
ديكسينيره م
تامسينماميش آللاهيمين حرارتين
دانيشماميش اينسان آدلي باراسيندان
دانيشماميش اوره گيمين ياراسيندان
آغري سيندان آجي سيندان
بشر سايدا دمير سايدا لكه سينده ن
دانيشماميش بو دونيانين گونش بويدا قاراسيندان
دانيشماميش عاشقليقين داردا قالميش ساراسيندان
بو دونيانين هاراسيندان هاراسيندان
ديكسينيره م
دانيشماميش كووره كليگين قارا باتميش له له سينده ن
آشيقلارين شاعيرلرين دردلي لرين دلي لرين آللاه آدلي شه له سينده ن
ديكسينيره م
كام آلماميش تنهاليقين
آللاه ليقين فضاسيندان
گوز آچيرام
كوهنه دونيا
ياشيل آغاج
الوان چيچه ك
واخت اويانير ساحات ايشلير
اوره ك ياتير
يئنه چولده ياغيش ياغير
من چالميرام يانيق كرم
گوز آغرييير
كيپريك قالخير آغير آغير
گره ك چيخام ائلي گزه م چولو گزه م
مني يئنه تانري بوغور
عادي فلك اللرينده يئر فيرلانير گونش دوغور
من باخيرام پنجره ده ن
يئنه چولده ياغيش ياغير
7/2/82 تبريز
ائله بير زاماندا ياشاييرام كي
آغلاماق ثواب سا گولمه ك گوناهدير
خيففت له ذيللت له ياشاماق غورور
جورئت له غيرت له اولمه ك گوناهدير
موعاهيده اولور قانونا كئچير
گوناه گاهدان دونور شاهلار تاجينا
ياشاماق عشقي لا ويرنيخانلاري
دال با دال ميخلايير دار آغاجينا
چينار يارپاقيندا بويلانير سويود
سن بير يارپاغيندا اسديره نميرسن
ايستبداد گون به گون قول بوداق آتير
سن بير بوداغيندا كسديره نميرسن
دربه در دوشركن خانيمانيمدان
ائششك پالانيندا دالدالانميشام
گاهدا سنين دئييل بو پالان دئيه
دويورلر سويورلر هر سحر آخشام
خانيميم اوشاقيم قورخماسين دئيه
هر آغاج يئنديكجه چپي چاليرام
قيزيم تهليكه سيز بويوسون دئيه
هرگون مانات كيمي خيردالانيرام
اوجاليق سئومه يه ن ارباب نامينه
يئنيب دره لرده آلچالميشام من
خانليق قارغاسيني لئش اوسته گوروب
بعضا قارتال دئيه ال چالميشام من
گوناهيم چوخ چوخ دور نئچه سين ساييم
بلكه دوستاقچي نين اوزو آغ اولسون
قوي جانيم چوروسون دمير قفس ده
قانون يازانلارين باشي ساغ اولسون
ائله يه بيلرديم يارانمايام من
حال كي يارانميشام اوز گوناهيمدي
ائله يه بيلرديم هئچ نه دئمه يه م
دينميشه م دئميشه م سوز گوناهيمدي
بئله بير خيففت له ياشايانلارين
اولمه يي گوناهدير قالماقي گوناه
كيم دير گوناه سوزون يوزان حوكمدار
بيلمه يي گوناه دير قانماقي گوناه
آخشامدا غريب دير
(آخشامدا غريبدير من ده غريبم
نه لر اوره گيمده ن كئچدي داريخديم)
"بهمن وطن اوغلو"
اومودسوز گومان سيز يول سوز يولاق سيز
كئچير قارا قارا گونلريم بئله
آهيمدان بويلانير بير سكوت شئعير
گوزوم ده ن داشلانير ساز گيله گيله
باشيما گله جه ك نه بيليم نه له ر
من اولينده يه م بو يولون هله
بوران قامچي سي ني قار كوته ييني
آتايديم يوللاردا قدم به قدم
سيزلانا بيله ييديم يوللار اوزونو
"آخشامدا غريب دير منده غريبم"
نه آنا نه باجي نه يول يولداشي
آغري ني كيم ايله بولوشمه گ اولمور
نيسگيل يئرين ساليب قاريج به قاريج
بير آندا يايينيب گولوشمه گ اولمور
دونه ن گئت گئت دئيير صاباح قول آچير
بوگونون كولونا ايليشمه گ اولمور
بو يئرده بير سالخيم يول يولچوسويام
تاني يا بيلمزكي مني بو عالم
سن كي تاني ييرسان آي داش اوره كليم
"آخشامدا غريب دير منده غريبم"
سينه ده ن سينه يه عصيرده ن عصره
داستاندا صوحبتده اوخونورام من
اريشيم قلم دير آرغاجيم قوپوز
كوهنه تاريخ كيمي توخونورام من
درين فضا كيمين اميره م نورو
نارين ياغيش كيمي قوخونورام من
آشيق اوخويوردو ياديندامي سن
دئدين كيم اولانماز "غريب" "شاه صنم"
ايندي ده دئييره م اوندا دا دئديم
"آخشامدا غريب دير منده غريبم"
دونيا يا كيم مينير كيم مينيك وئرير
شله كئش دوغوبدور بيزي آناميز
اوره كده گله جه ك كوره كده كئچميش
حيات يوللاريندا يالقيزيق يالقيز
بلكه ياز داغلارين او اوزونده دير
آنجاق هاوا هله آليزدير آليز
بو گون كيم اولموشام صاباح كيم اولام
فيكرين ائله ينده آليشير سينه م
يئنه كووره لميشه م يالقيزجاسينا
"آخشامدا غريب دير منده غريبم"
منه قانیق وئرمز بوگون پیاله
بو آخشام قیسمتیم کوپه ده ن گلیر
باخما عشقین تبی دیرناقدان چیخیر
منی چیچه کلرین شیره سینده گز
قاپینا چیچه ک له گله بیلمه سه م
خیلقتین روحوندا دیری بیل منی
سنین قوجاقیندا اوله بیلمه سه م
روحومدا حقیقی بیر اولمزلیک وار
باشیم بو دونیادا چکسه ده نه لر
"مولان" داغلاریندا بیر چیچه گ آرتار
هر زامان "یورغونون" اولوب دئسه لر
ساقی دولدور قوی منی مئی مست و مدهوش ائیله سین
دولدو قوی جان دورد ایله دردی هم آغوش ایله سین
خاطریم خالین خیالیندان خراب و خسته دیر
خوم گتیر قوی خاطریم خالین فراموش ایله سین
یاندی جانیم یاندی جانیم عشقدان ساقی آمان
ائیله مئی وئر کیم بو یانمیش جانی خاموش ایله سین
هر سر زولفونده گر سر ده ن کئچیر سرکرده لر
مقتل عشاقی وار حقی سیه پوش ایله سین
" یورغون" اولسه ساقیا میخانه لرده دفن ائله
قوی شراب ناب عشقی دم به دم نوش ایله سین
۲۵/۷/۸۷ مولان
میضراب میضراب قاپیمی دوی
قوپوز قوپوز کونلومو آچ
قوشما قوشما چیچه گیمده ن
غزل غزل چمنیمده ن
کیتاب کیتاب دسته باغلا
*
کونلومه کئچ
سحر چاغی کولدان سوزه ن بیر مئه کیمی
کونلومه کئچ
یارپاق اوسته داندان قالان بیر شئه کیمی
کونلومه کئچ
قاپالاغی آیاقلایان قوزو کیمی
کونلومه کئچ
سئوگیلیمین اوزو کیمی
کونلومه کئچ
نارین یاغان بیر دم لنمیش یاغیش ایله
کونلومه کئچ
بیر ایستکلی باخیش ایله
*
ماهنی ماهنی آغری اولوم بوغازیندا
اوخو منی
دویغو دویغو سه په له نیم گوزلرینه
آغلا منی
کوپدن کوپه جامدان جاما سوزه له نیم
دوداغیندا ساخلا منی
ببکلرین ائویم اولسون
دالغالاندیر ائویمی ییخ
یولداش دئیه ال اوزادیم
یولداش دئیه الیمی سیخ.
۲۵/۷/۸۳ مولان"دورد درد" کیتابیندان
کیم غم عشق ایچره اولدو دردی معلوم اولمادی
کیمسه جاندان باشقا بیر زاد وئردی معلوم اولمادی
جان وئره ن مردانه جان وئردی صلیب عشق دا
هئچ بو وادی نین بیرآن نامردی معلوم اولمادی
یوزلرین ذکر اناالحق ایله دوزدو آسدیلار
مین لری اولدو و لکن وردی معلوم اولمادی
شمع بیر مکتب سه پروانه اونون اوستادی دیر
اما بو اوستاد کیمین شاگردی معلوم اولمادی
هاردا اولدو هاردا اولدو سورسالار سندن اگر
سویله "یورغون" لا مکان دیر یوردو معلوم اولمادی
۲۵/۷/۸۷ مولان
محو اولون فیکریمدن ای حیکمت دولو تدبیرلر
درد عشقه مبتلایام سیزلیرام ایللر بویو
بلکه سیز درمان قیلئیدیز ای زاوال سیز پیرلر
وادی فقر و جنون حقا مقام قرب دور
قوی هله دورد دووره ده جینگیلده سین زنجیرلر
ترک مسجد قیل بیزیم میخانه میزده مسکن ائت
گور نئجه ساقی الینده پایلانیر تقدیرلر
قاب قوسینی منیم قانیم لا چون تکمیل اولور
حقی واردیر گر سوسوز دور قانیما شمشیرلر
وصف هوری و جنانی زاهدا گل ترک قیل
وادی عشق ایچره تاپماز مشتری تزویرلر
پرده عیصمت گوتورسه مسجد و منبر اگر
نیله یر زهد و ریا کویوندا غافلگیر لر
"یورغونا" جام جنون وئردی سه ساقی اجل
باب خلقتده گرکدیر قورتولا تفسیرلر ۲۵/۲/۸۷ تهران
بیر عاریف سوروشدو بیر اکینچی ده ن
هانکی دین ائدیبدیر سنی بخته ور؟
سویله دی مذهبیم اکینچی لیک دیر
دونیادا هامی اوز اکدیگین بیچر.
حیدر عباسی "باریشماز"کئچن گونلر یادا دوشدو آ دوستوم
خاطیره لر گوزلریمده یاش اولدو
نئجه قیدین او سئوگی یه آی ظالیم
نئجه قلبین داشا دوندو داش اولدو
***
کئچن گونلر یادا دوشدو سئوگیلیم
بیز حیاتی حیات بیزی بوشادی
بیر ساحاتین هیجرانینا دوزمه یه ن
عومرو بویو اینتیظاردا یاشادی
***
کئچن گونلر یادا دوشدو داریخدیم
اوره گیمین باشی یاندی نه یاندی
بولود کیمی یاشا دوندوم آغلادیم
گوزلریمین یاشی یاندی نه یاندی
***
کئچن گونلر یادا دوشدو تیتره دیم
بودره سه م ده ییخیلمادیم ائله کی
من دئییردیم یقین سن سیز اوله رم
اولمه میشه م یاشاییرام هله کی
***
کئچن گونلر یادا دوشدو آ دوستوم
هاییف اولسون بیر ده گلمز او گونلر
گون گلر کی سن ده منده اوله ریک
آرخایین اول آنجاق اولمز او گونلر
***
کئچن گونلر یادا دوشدو آ دوستوم
توز بوروموش جیغیری دا ایزی ده
نئچه نسلی یولا سالان بو دونیا
واخت یئتیشه ر یولا سالار بیزی ده
آنجاق اولمز بی سوز قالار یادیندا
کئچن گونلر کئچن گونلر آدیندا
۱۸/۲/۸۷ تهران"کیمه قالسین"
تاکسی دا اتورموشدوم. منده ن باشقا اوچ نفر ده اوتورموشدو. اوتورانلارین بیرینین آدی "پاپیر" ایدی . پاپیر بیر آز دلی ته هه ریدی. هئچ اولماسا خالق ائله بیلیردی. یئکه بیر کیشی ایدی پاپیر. یئکه ده بیر شالوار گئیه ردی. پاپیر بیر آن سوروجویه دئدی ساخلا من دوشوره م. سوروجو ساخلادی. ماشین دان دوشدو. جیبینده ن پول چیخاریب سوروجویه ساری اوزاتدی. سوروجو پاپیرین اوزونه باخمادان اوجا سه سله دئدی: "پاپیر قالسین". پاپیر دایانمادان جاواب وئردی"کیمه قالسین؟!"
- "هه؟ نه وارکی؟" ائرکک تولکو دیشی تولکویه دئدی.
- حوکمدارین توفنگچی لری گلیرلر. آیری لیق آنلاری گلدی یئتیشدی. یاخشی یامان حالال ائله.
- هئچ قورخما عزیزیم. سن هئچ بیلیرسن حوکمدار تولکولری نیه الدوتدورور؟
- نیه کی؟
- حوکمدارین تولکو دریسینده ن یامان خوشو گلیر ائله اونون چون بیزیم دالیمزجا دیر کی بیزی اولدورسون و دریمیزده ن اوزونه آرخالیق تیکدیرسین.
- بو کی لاپ پیس دیر.
- یوخ عزیزیم. بیر تولکونون دریسینده ن آرخالیق چیخماز. ائله اونون چون دا بیر آرخالیق تیکمه گ اوچون ایکی تولکو دریسی لازیم دیر.
- بو نه دئمک دیر کی؟
- آیریلیقدان قورخما عزیزیم. بیزی اولدوره نده ن سونرا دریمیزی بیر بیرینه تیکیب حوکمدارا آرخالیق تیکه جه کلر. او آرخالیق ییرتیلانا قده ر هله بیز بیرگه یاشایاجاییق.
دیشی تولکونون گوزلری دولدو.
توفنگین سه سی دره نی دولدوردوانتظار وصلینه تاب و توانیم قالمادی
درد عشقین ،تاب جسم زاریمدان فزون ایمیش کیم اول
گوزده نوروم، دیلده صبریم، تن ده جانیم قالمادی
كونلومه مسكن شكنج زولفون ايدي روز و شب
لعنت اول باد صبايه خانمانيم قالمادي
سیر حوسنون چون قاپیندان سرو لر بویلاندیلار
بو خمیده قد له کویونده مکانیم قالمادی
۲/۵/۹۲ - اصفهان
خوشوم گلمير سنين اوچون نغمه قوشان اوزان لاردان
خوشوم گلمير قوجاغينا هتل كيمي باخانلاردان
خوشوم گلمير قوجاغيندا مين اويوندان چيخانلاردان
شوهرت اوچون، آلقيش اوچون، تئز تئز چكيرلر آديني
اوجاغيندا قيزماق اوچون اوغورلاييرلار اودونو
سنه شاعير نه لازيم دير؟
سنه آشيق نه لازيم دير؟
ياد اللرده قالان وطن،
چيچك لري سولان وطن،
اولسون آنان، اولسون باجين،
اولسون من تك بالان وطن.
16/9/91 صوفيان
اشك آل و چهره خونباره زحمت وئرمه ديم
آه سرد ايله خزان زرده بولدوم فيض وصل
عومر باغي پرپر اولدو، خاره زحمت وئرمه ديم
ييخدي دردين، شووق درمانين اوچون، ميننت سنه
جسم زار ايله تن بيماره زحمت وئرمه ديم
احتمال وصل، تبديل اولدو ياس مطلقه
بخت و تقدير كم و ادباره زحمت وئرمه ديم
3/2/91/ اصفهان
اولسا مونس، درد هیجرانین بیان ائتمزمی دیم؟
ساچلارین عطرین صبا دان بیر نفس آلسام اگر
تا نفس وار نی کیمین آه و فغان ائتمزمی دیم
وصلینه امیدیم اولسایدی، طریق جهد ایله
اولسا، مین لر احتمالی امتحان ائتمزمی دیم
یاس دن دیر هیجر دردیندن شکایت ائتدیگیم
مژده وصلین ائشیتسم نقد جان ائتمزمی دیم
"یورغونا" معلوم اگر اولسایدی سمت کوی یار
ایت کیمین منده سرکویون مکان ائتمزمی دیم
3/3/92-صوفیان
هيچ بولبون خاره خاطير ترك گلشان ايله مز
عشق دردي ايله شيرين دير، هلاكين گورسه ده
عاشق صادق بير آن تدبير درمان ايله مز
منده سئوداي گداليق پوزدو نظم كويونو
قاشلارين شمشیري يوخسا بوش يئره قان ايله مز
داش اگر حوسنون گوره باغرين ده لر، توپراق اولار
هانسي صبر ايله گوروم كويوندا افغان ايله مز
كفر زولفون دوزدو محكم لتدي ايمانيم ولي
بويله تعليم شريعت هئچ مسلمان ايله مز
خط و خالين گيزله، ايمان اهلينه بير رحم قيل
كيم گورن حوسنون كيتابين ميل قرآن ايله مز
گر سر كويوندا رسواليق مقامين درك ائده
ببينوا مجنون يئرين كوه و بيابان ايله مز
گورمه ديم توبه قيلا، كويوندا عشاقين بيري
جور و ظلمون خيل عشاقي پريشان ايله مز
هر خدنگي روزن اولدوقدا قارانليق كونلومه
ياغديرار دائم خدنگين ترك احسان ايله مز
رند بي پروا دي "يورغون" عشق تقدير ائتمه سه
عقل تدبيري له او تمثيل فرمان ايله مز
91/1/29 اوچاقين ايچينده - تهرانين اوستونده
بير آن دا ياشاسان بو سئوگي ني من******** بير عومور عذابا، آغري يا ده ير
سني سئوديگيمه پئشمان دئييلم******** مني يانديرسا دا ظولمت گئجه لر
من سني سئوميشم آي ايشيقيندا
او سوزگون باخيشين باغريمدان كئچير******** جانيما اود ووروب يانديرير مني
بورا جان حياتي سهو آنلاميشام******** عشقين اوستاد اولوب قانديرير مني
نيچه دير، سقراط دير سانكي بو سئوگي******** حيات فلسفه سين آنديرير مني
من سني سئوميشم آي ايشيقيندا
باخيرام چمنده، چيچكده قاليب******** هم آيين ايشيقي، هم سنين ايزين
چيچك ياناغينا، چمن ساچينا ******** حيات باخيشينا اوخشادير اوزون
بير ساغلام، شرفلي عومور يولوندا******** سئوگي آنديميز دير بيز ايكي ميزين
من سني سئوميشم آي ايشيقيندا
آي كيمي اينجه ليب ناز ائله سن ده******** اونوتما، هئچ زامان اونوتما مني
كرم ام، غريب ام، ده ده بابا يام******** ائلين تاريخي تك سئويرم سني
من ناشي دئييلم بابالار كيمي******** آچمارام سئحيرلي، سيرلي دويمه ني
من سني سئوميشم آي ايشيقيندا
4/7/91/ صوفيان
شاختا بهره سيني، باريني دويموش ******** آياق آلتدا قالان بوداق كيمي يم
اوزونه ده يمه ميش بير سينيق كوزه ******** گوزللر اونونده چوكمه ميش ديزه
بير اوجقار مئشه ده بير ياشيل دوزه ******** غريب غريب آخان بولاق كيمي يم
بير سولغون پائييزم، قار قوجاغيندا ******** بير قوجا قارتالام سار قوجاغيندا
غريب كوچه لرين دار قوجاغيندا ******** آياق آلتدا قالان يارپاق كيمي يم
بير كيمسه سورماميش نه يين دي نه يين؟ ******** نيه تاپدالاندي حاققين، امه يين؟
قارا سطيرلر له او آغ اوره يين ******** ياري سي يازيلميش واراق كيمي يم
سئوگي بويدا قيفيل ديلينه دوشموش******** آيلارين ايللرين الينه دوشموش
طالعين دويونلو تئلينه دوشموش******** گئري دونه نمه ين داراق كيمي يم
آهيم لا تانيش دير بو ماحال، بو ائل******** سانكي دئيير شاعير پاييميزي وئر
يوزلر كوهنه صحبت، مين لر تازا شئعر******** اوستونده قوروموش دوداق كيمي يم
ايتيرمه سين دئيه ائلين دوزونو******** گيزله ييب بير عومور اوره ك سوزونو
بير ياساق سئوگي نين ايللر اوزونو ******** آتشينه يانان اوجاق كيمي يم
اولمادي درديمي اودومو بيله ن******** كونلونو پايلايان؛ عشقيني بوله ن
بير يالقيز ياشايان، بير غريب اوله ن******** "يورغونام" دونيادا قوناق كيمي يم
23/4/90 تبريز - باغمئشه
كئچن عومروم گوزلريمده واراقلانير ناغيل كيمي