پاییز

پاییز روحلو بیر آغاجام

یاناقلاریم قیپ قیرمیزی

یارپاقلاریم ساپ ساری

آماندیر ترپه تمه منی!

توکوله رم شه هه رین خیاوانلارینا.......29/7/92/ صوفیان

بو شاعیر عومرومون پاییز گونلری

یئنه گوزلریمدن سوز اوغورلاییر 

بو شاعیر عومرومون پائیز گونلری

پیالا پیالا گوز اوغورلاییر 

بو شاعیر عومرومون پائیز گونلری

آل الوان گئیینیر، گوزله دونور 

قوشما پالتاریندا غزله دونور

ازیلیر، توکولور، خزله دونور 

بو شاعیر عومرومون پائیز گونلری

گورکمی، دوروشو یاز هوسی دیر 

یولداشی قیش الی، قیش نفسی دیر

آیریلیق نغمه سی، اولوم سه سی دیر 

بو شاعیر عومرومون پائیز گونلری

مین رنگه بزه نیر چیچه ک لر کیمی 

تیتره ییر، اوشویور اوره ک لر کیمی

وعده سیز سارالیر دیلک لر کیمی 

بو شاعیر عومرومون پائیز گونلری

کونلومو آسمیشام بوداغلارینا 

آدیمی یازمیشام یارپاغلارینا

آغی دیر فله گین قولاغلارینا 

بو شاعیر عومرومون پائیز گونلری

دونه نیم یارپاقسیز بوداغا بنزر 

صاباحیم بوداقسیز یارپاغا بنزر

یازیلیب آتیلمیش واراغا بنزر 

بو شاعیر عومرومون پائیز گونلری

یئنه ده بورانا، قارا تله سیز 

اوزوده بیلمه ییر هارا تله سیر

بلکه ده بیر سویوق گورا تله سیر 

بو شاعیر عومرومون پائیز گونلری

منی اونوتسا دا هر گلن باهار 

نه قدر دونیادا هله پاییز وار

آدینی هر ساری یارپاغا یازار 

بو شاعیر عومرومون پائیز گونلری

بیر کاروان یولو دور، گوذاردی سانکی 

شاعیر دی، آشیق دی، یازار دی سانکی

بیر "یورغون" عطیرلی مزاردی سانکی 

بو شاعیر عومرومون پائیز گونلری

29/7/92 -صوفیان