دامجی عومرو
داغ دالیندان گونش چیخیر
چیخیر تازا گلین کیمی
جیلوه له نیر
ایشیق ساچیر دنیزلره
ایشیق ساچیر
اود چیله ییر
دنیز اوینور، دنیز اوینور، دنیز اوینور
رقصه گلیر
رقص ائله ییر
بخار اولور،
بولود اولور
یاغیش اولور
یاغمور اولور
دامجی دامجی دوشور یئره
دوشور بیر گول بوداغینا
دوشور بیر قونشو باغینا
دوشور وطن تورپاغینا
آخیر
آخیر سئله دونور
چایا دونور
یئنه دونور دنیز اولور
فقط
منی دوشوندورن
یاغیش ایله گول یارپاغین قوهوم ائدن او قوه دیر،
هر بیر داملا اوز سئودیگی گول یارپاغین تمیزله ییر
هر بیر داملا سئچیر اوز سئودیگی گولو
اونا یاغیر
بوندان غئیری اولا بیلمز
من اوزومده گوردوم بونو
بخار اولدوم
بولود اولدوم
یاغیش اولدوم
یاغدیم سنین تورپاغینا
سیزقا سیزقا آخدیم سنین ایاغینا
سنی دئییب رقص ائله دیم
سنی دئییب دالغالاندیم
سنی دئییب هاوالاندیم بولودلار تک
باها عومرو اوجوز کئچدیم
نئچه گئجه گوندوز کئچدیم
آجی شیرین خاطیره لی تبریز کئچدیم
دورنا گوزلو دنیز کئچدیم
سنه دوندوم
چای دنیزه دونن کیمی
سنه دوندوم
غریب عسگر وطنینه دونن کیمی
سنه دوندوم
انسان اوغلو مزارینا دونن کیمی
خومار گوزون سون مزاریم اولاجاقمیش
ایستی قوینون سون وطنیم اولاجاقمیش
سنی دئییب آخاجاقمیش جانیمدا قان
سنی دئییب باخاجاقمیش گوزومده نور
سنی دئییب ییخاجاقمیش سرحدلری دلی کونلوم
سنی دئییب چیخاجاقمیش قفسیندن مرغ روحوم
دامجی دنیزه قووشوب دنیز اولور
منده سنه قووشدوقجا سن اولورام.
22.7.98 اورمیه
كئچن عومروم گوزلريمده واراقلانير ناغيل كيمي