درد

زامان زامان درد بیزیم له یولداش اولدو، قارداش اولدو
عزیزله دیک جانا باسدیق جانیمیزا گلن دردی
سن دئمه کی درد اوزو ده دردلره درمان اولارمیش
فلک بیزه تازا دردی کوهنه درده درمان وئردی

تازا دردلر کوهنه درده درمان اولور، اوستون اورتور
کوهنه درد دن قوپار قوپماز آلیشیریق تازا درده
تازا دردین تازالیقی تازا دردین ذووقون آرتیر
تازا درد دن تازا تازا ایلهام آلیر کوهنه لرده

باخ بئله جه پیلله پیلله قورولور درد بینووره سی
بو بینووره لای لای آرتیب، زامان زامان دیوار اولور
دیوار دیوار درد دن قالخیر دیوارلارین دورد دووره سی
کیچیک بیر ائو یاواش یاواش اوجالیر بیر دربار اولور

سونرا قاپین آچیق اولور درد آلیرلار درد وئریر لر
بو آل وئرده زامان زامان قازانیرسان، شاه اولورسان
یاواش یاواش اویرنیرسن، درد دن دردلر یارادیرسان
دردلر سنین بندن اولور، دردینه آللاه اولورسان

درد اوزو ده بیر قیسمت دیر، بیرینه آز بیرینه چوخ
دردین اوزونون ده بئله، کاسیبی وار یوخسولو وار
درد اوزوده انسان کیمی حیات قورور، ائو دوزلدیر
دردین اوزونون ده بئله نوه سی وار، اوغولو وار

بلکه دردلر دونیاسیندا ، بیزده دردلرین دردی ییک
بلکه اولارین دا بختی، بیزی اولارا درد وئریب
بلکه دونیا اونلارین دیر، بیز باشقا یئردن گلمیشیک
بیزه دردلرین آللاهی، درد اولکه سینده یورد وئریب

درد دوغمادی بیز اوگئییک، بیز دوغماییق درد اوگئی دیر
هر نه دیر سه قالیب قالیب دردیمیزله دوغمالاشدیق
ائله بیزه دوغمالاشدی تازا دردلر کوهنه دردلر
درمان وئرن دردسیزلردن، یئنه دردیمیزه قاچدیق

دونن ائل لر گزیب داستان دئیه نین
بوگون اوز داستانی ائل لرده گزیر

یئریییر کروانیم منزله دوغرو
منده زامان زامان زامانلاشیرام
ائل داغدان قاییدیر، یوک یاپین چاتیر
من داغلار باشیندا دومانلاشیرام

حاققین قاپیسینی کیم کیلیدله دی؟
کیلیدینی آسدی ده وه بوینونا؟

اولوم منی یاشاماغا حریص له دیر

یاشام منی اولمه یه هوسلندیریر

اولجه عالم ایدیق،
سونرا دونیالارا بولوشدوک
دونیا اولدوق، اولکه لره بولوشدوک
اولکه اولدوق، شهر لره بولوشدوک
شهر اولدوق، کوچه لره بولوشدوک
کوچه اولدوق، ائولره بولوشدوک
ائو اولدوق، پنجره لره بولوشدوک
پنجره اولدوق، اوتاقلارا بولوشدوک
اوتاق اولدوق یاتاقلارا بولوشدوک
یاتاق اولدوق، آداملارا بولوشدوک
آدام اولدوق ال لره، جیب لره بولوشدوک
ال لرده جیب لرده خیردالانیریق ایندی

درد اهلی ییخیلدیقدا گرک درده ییخیلسین
درد اهلی گرک درده دوشن یئرده ییخیلسین

دردانه ائدر پیر فلک درد ایله مردی
بو قاعده دیر مرد گرک درده ییخیلسین

نامرد ییخیلار مرده ده، نامرده ده اما
گوستر منه بیر مردی کی نامرده ییخیلسین

سرد ائیله مز عاشق نفسین، نفخه نامرد
نامرد نه چی دیر؟ مرد گرک مرده ییخیلسین

سرکرده ایاقدان دا دوشر، دوشمز ایاقه
سرکرده اودور کیم همشه سر ده ییخیلسین

جان قیمتی دیر پرده اسرار محبت
عاشق ییخیلار قویماز آما پرده ییخیلسین

هو حق مددی! شیر خدا حیدر کرار
احسان ائله یورغون در حیدر ده ییخیلسین

خوشبخت لیق دا بیر قوش کیمی دیر
گاهدان آدامین گوزو اونونده
اوچور
اوچور
اوزاقلاشیر
اوزاقلاشیر
و گوزدن ایتیر

نه لر چکدیم بو دونیادا، نه سن بیلدین نه کس بیلدی

بو یورغون بولبولون افغانی نی آنجاق قفس بیلدی

مسجدلرین الی له، میخانه لر ییخیلدی

سجاده لر سوزویله، پیمانه لر ییخیلدی

نادانلارین ایپینده، فرزانه لر آسیلدی

نامردلرین الی له، مردانه لر ییخیلدی

دوزدانیمی سیندیردیلار

دوزون یاراما توکدولر

بیر جه آغ یئل قاپیمیزی آچماسا دا قوی آچماسین
بیر جه بولبول باغچامیزدان اوتمه سه ده قوی اوتمه سین
بیز اوزوموز بویوک آچیق قاپیلاریق آغ یئل لره
بیز اوزوموز عطیر دولو چیچک لریک بولبول لره
ال باخاری گوز دوستاقی اولمامیشیق عومور بویو
بیز هر آخشام
بیز هر صاباح
یئرین گویون قیسمتینی پایلاییریق

بیز هر آخشام

بیز هر صاباح

طالع لرین دفترینه قول چکیریق

قیسمت بیزیم اوزوموزک
طالع بیزیم اوزوموز دور
هر شئی بیزدن باشلانیبدی
هر شئی بیزده سونا چاتیر
گویه باخساق یاغیش یاغار
یئره باخساق چیچک بیتر

آغری دولو، سئوینج دولو، بیر اوره ییک

یومروق بویدا بیر اوره ک له
یوزلر، مین لر کهکشانیق،

هر شئی بیزدن باشلانیبدیر
گویده آخان اولدوزلاردا
بیزه باخان بو گونش ده
دنیزلرده رقص ائله ین بالیق لار دا
زمی لرده رقص ائله ین سونبول لرده
بیزیم یاخین دوستوموز دور
حیات بیزیم اوغلوموزدو،

قیزیمیزدیر
حیات بیزیم اوزوموزدور

اولوم بیزه حتی بئله اوگئی دئییل
اولوم بیزه سونونج دئییل
اولوم بیزه قورخونج دئییل
اولوم اوزوده بیر دلی دوستوموزدور
اولوم اوزوده حیات دیر بیزیم اوچون

اولوم بیزه تقدیر دئییل،

بیر سئچیم دیر
بیر سئچیم یوخ مین سئچیم دیر
گویده اولدوز سئچیمی تک
یئرده چیچک سئچیمی تک
بیزه سونونج اوزوموزوق
هر شئی بیزدن باشلاییبدی
هر شئی بیزده بیته جک دیر.

2/5/95

آلا گوزلوم
گل آل مني
گئدك بوردان
گئدك بوردان اوزاقلارا
ياخينلاردان اوزاقلارا قاناد چالاق
گولر اوزلو بولاقلارين دوداغينا دوداق وئرك
اوجا بويلو آغاجلارا بوداق وئرك
دئييرم گل گئدك بيزه
بيزدن اوزاق بيز ائوينه
كونول وئرك سازا سوزه
قوناق دوشك كيشي لرين قيز ائوينه
چورك اولاق دوز ائوينه
آلا گوزلوم
گل آل مني قوينوندا كي مئشه لره
كوكسونده كي چيمن لره
گل آل مني گوزونده كي بولاقلارا
گل آل مني باخيشندا اوزاقلاشان اوزاقلارا
آپار مني ال چاتمايان زيوه لره
آپار مني داغلار دولو دومانلارا
هوسه دون گوزلريمده
نفسه دون حياتيمدا
گئرچه به دون، خيالا دون
آپار مني گومانلارا

قالان عومروم يئتمز سنه
يئتمز سنه ساريلماغا
قايتار مني هله سني سئومه دييم زامانلارا آلا گوزلوم،
قايتار مني، منيم لاپ ايلك گوزليم اول
ايلك يازديغيم غزليم اول
پادشاهيم، حوكمداريم، جانيم، روحوم، فيضوليم اول،
قايتار مني ال چاتمايان زامانلارا
قوي آديني نعيمي يه، نسيمي يه هوججوله ييم،
گوزلرينين اول حرفين مذهب ائديم اورتا دوغو ائللرينه
مكتب اولسون اول حرفي گوزلري نين
كناب اولسون باخيشلارين
حروفي ليك قوي گوزلريندن باشلاسين
دريمي بير اوشاق گئيسين آياغينا
حلبين كوچه لرينده
آلا گوزلوم
گل آل مني گئدك بوردان
هارا دئسن گئدك، اما بيزه گئدك
تبريزي گوتورك اما
باشقا بير تبريزه گئدك

تیر 95

آلاگوزلوم!
دردین آلیم!
بیر آخشام گل!
دردلریمی گوزلرینده شوشه لندیر
بیر آخشام گل
دردلریمی سنین گوزونله آغلاییم
بیر آخشام گل
دردلریمی آلا گوزلرینله آغلا
یاغیشا دون
سوسوز قالان صحرالاری مئشه لندیر
آلا گوزلوم
بیر آخشام گل!
منی مندن خلاص ائیله، نئشه لندیر
آلا گوزلوم
بیر آخشام گل!
گوزلرینه، خومار آلا گوزلرینه کیتاب دولدور
بو حیاتی حریف حریف، گوزلرینده اوخوت منه
بو وارلیقی گیله گیله آخیت منه
هر گون سحر فلسفه سوز گوزلریندن
آخ او گوزونون قاداسی
افلاطونا، کانتا ده یسین!
هر گون سحر عرفان دانیش گوزلریندن
آخ او گوزونون قاداسین
ابوسعید، هلاج آلسین!
هر گون سحر حکمت دانیش گوزلریندن
آخ او گوزونون قاداسین
ابن سینا،
ملاصدرا،
سهروردی،
عقل چی لار،
عشق چیلار،
اشراق چیلار،
کیملر کیملر آلسین سنین!
هر گون سحر هر نه دئییب دانیشسان دا گوزلریندن
هر گون سحر هر نه منه اوخوتسان دا
هر آخشام گل سئوگی آخیت گوزلریمه
هر آخشام گل
قوی منطقی، فلسفه نی، عقلی، عشقی،
باخیشینا قوربان وئریم
هر آخشام گل
درسیمی اوزوم اوخویوم قوی گوزونون کیتابیندان
هر آخشام گل
حیکمت دولو حیاتیمی بوغ گوزونده
هر آخشام یئنی دن منی
دوغ گوزونده ...

تیر 95

قاپيني شعيرله دويورم
قاپينا شعيرله گليرم
شعري اوزومه توتورام
گوزلرينه ساريلماغا
آلا گوزونون قاداسي
بوتون كيتابلاريما ده يسين،
آلا گوزون امر ائيله سه
غزل اولوب دفترلرده يانارام من
قوشما اولوب دوداغينا قونارام من
آلا گوزون امر ائدرسه
آللاه نه دير؟ فضولي ني دانارام من...

تیر 95

من قورخورام بورالاردان
گاه ایشیقدی
گاه قارانلیق
گاه ایستی دیر
گاه سویوق دور
من قورخورام بورالاردان
منی بوردا تک بوراخما
تاپشیر آلا گوزلرینه
کورپه اورک دویونتومو

تیر 95

ائله واخت گلیبسن حیاتیما کی
واختسیز خزان کیمی توکولمک ده یم
آناسیز اوشاق تک سفیل له نیرم
کیشی سیز ائو کیمی سوکولمک ده یم

طالع ائله زامان سنی وئردیکی
بئلیمی ایمیشدی کیمسیزلیک یوکو
یاریسی ازیلمیش ایلانلار تکی
قیوریلیب اوزومه بوکولمک ده یم

بولاق تاپ گوزومون بولاغی کیمی
کیتاب تاپ کونلومون واراغی کیمی
کاسیب بیر کیشی نین پاپاغی کیمی
مین دفعه سوکولوب تیکیلمک ده یم
12/4/95 ساعت یازده