شئعرلرين يامان سوكور اوره گيمي

وطن دولو، سئوگي دولو، اينسان دولو آرزيلاريم،

اومودلاريم

مزاريندان خورتلاياركن گوزلريمه گوز تيكيرلر

...


- كاش كي سينا دمير قفس

آزاد اولا ياساق اولان آنا ديليم

آزاد اولا دوستاق دوشن آنا وطن

پاسلي قيفيل لار آچيلا قلم لردن

ميضراب لاردان

بوراخيلا دوشونجه لر قفس لردن

ايته باتا ايستيبدادين كوت دهره سي

كاشكي . . .(اون ياشيمدان بو ياشيما ديله ديگيم ديله ك بودور)

جانيم يانير،

يئنه يامان سيخيليرام

بيزينسمن پالتاريندا

بئش اولدوزلو هتل لرده ائيله نيرم

سن دئميش كن "آج اوشاقلار ساغليقينا"

بيزينسمن پالتاريندا، 

باشيمدا كوهنه ديلك لر

اوره گيمده مين ايللرين آغري آجي سي گوينه يير

بيزينسمن پالتاريندا بيرشاعيري بير آشيقي سورويوره م اوزومونه ن.

بئش اولدوزلو هتل لرين سوفره سينده اوتوراندا

قاراداغين اوجقاريندان آج اوشاقلار گوزلريمه گوز تيكيرلر

ايستبدادين كوپه ك لري بير ماسانين آرخاسيندا اللريمي سيخان زامان

زيندانلاردا جان چوروده ن

وطنيمين ايگيد جانلي شئر لرينده ن اوتانيرام

آماندير قوي بيلمه سينلر 

من شاعيره م

من آشيقام

يوخسا موطلق قول آتمازلار موقاويله واراقينا

یامان چتین کئچینیرم

یامان چتین کئچینیرم. . .