درد آدامی قوهوم ائدیر آداملار لا

 

درد بیر توخوم دور

اینسان اوره یینده بویویور، درد اولور

بویودوکجه اینسانی دا بویودور درد

درد آدامین دوستو اولور

هامی دان چوخ جان یاندیریر

هامی دان قان ایستی اولور

اوره یینده درد اولاندا، اوره یینده درد اولانلار دوستون اولور

درد چئورندن دردسیزلری اوزاقلادیر

درد چئوره نه دردلی لری یاخینلادیر

هر دردین ده انسان کیمی اوگئیی وار دوغماسی وار

اوته اوته دوغما دردلر دوغمالاشیر

اوگئی دردلر اوگئی له شیر

درد آیریر سنین اوچون اوز دوغمانی اوگئیینی

درد آدامی قارداش ائدیر یادلارینان

درد آدامی یولداش ائدیر اوزگه لر له

درد آدامی سیرداش ائدیر باشقالارلا

درد آدامی قوهوم ائدیر آداملار لا

30/4/94 - تبریز

 

بیر گون چیچک آچارسا دا

بیر گون باهار گله ر سه ده

گلن باهار، آچان چیچه ک نه بیله جک؟

اوره ییمین چیچه ک دولو، باهار دولو سئوگی سی نی،

بیر گون چیچک آچارسا دا بو ماحالدا

نه بیله جک مین ایل قاباق بو ماحالدا

چیچک دئیه کیمسه نئجه ویرنیخیردی

یوخ!

اولومسوزلوک افسانه دیر آی شاعیرلر!

تکی چیچک آچسین دئدیم

تکی باهار اولسون دئدیم

اولماسام دا بو حیات دا، گولسون باهار

کول اولسام دا مزاریمدا، آچسین چیچک

یالنیز منیم خطیریمه یوخ،

منیم قدر، لاپ مندن ده حرارتلی

چیچک سئوه ن اوشاقلارین، نوه لرین خاطیرینه....

28/4/94 تبریز

یئنه قولاغیما یئل پیچیلدادی

یئنه قولاغیما بیر کولک اسدی

کسدی فلسفه نین ایتی پیچاغی

آرزیمین اوزانان تئلینی کسدی

ای اولو تانری نین محتشم اوغلو

بوتون بو کائینات، هوس دی، بس دی

بو یئر گوی بیر چیمدیک هوسه ده یمز

****

دوغولوب آرتسان دا سن شهر شهر

ائو ائو، اوتاق اوتاق، غریب سن له له

من نئجه دانیشیم، آغری دان سنه

سن اوزون هر نه یی گوروبسن له له

ناحاق گوی اوزوندن گلیبسن یئره

ناحاق او قفسی قیریبسان له له

بو جان او قیردیغین قفسه ده یمز

****

داشلار اوز کوکسونه آدیمی یازیر

یازیق یازیق اولان داشلارا یازیق

اتیمی، قانیمی قورد قوشلار یئییر

یازیق بو قوردلارا قوشلارا یازیق

بلکه ده داشیمی بیر یاش ایسلادیر

یازیق او گوزلره یاشلارا یازیق

****

داشلار مزار مزار یازیر آدیمی

اوره یی داشداندی، داشلارا نه وار

زحمتینه ده یمز، موفته آپاریر

منی اوز چیینینده آپاران آزار

نه یه آغلاییرلار؟ نه یه بیلمیرم

بلکه ده دونیا دا هئچ سس سیز مزار

آغلایان، اینله ین  بیر سه سه ده یمز

****

حیات، میلیونلارین اویناشی حیات

اوپولموش مین کره، اوپموش مین کره

مین قورد یاتاغیندان، مین مرد الیندن

قاپیلمیش مین کره، قاپمیش مین کره

خانیم یاسدیقیندا، کیشی جیبینده

چاپیلمیش مین کره، چاپمیش مین کره

****

حیات سئچمه دیگیم عومور یولداشیم

باخیر خئییریمدن، باخیر شریمدن

ائنیر دره لره، ائنیر دوزلره

سورونور، سومسونور منیم وریمدن

ایللردیر جانیم لا ائشیدیرم من

مودام بیر سس گلیر نفس لریمدن

بو حیات چکدیگین نفسه ده یمز

29/11/93 - تبریز

تبسسوم

مایاسی بیر تبسسوم دور بیر غزلین،
تبسسوم ائت، دفتر دفتر غزل له نیم
سئوگی نورو سئون لری گوزل له ده ر
سئوگی پایلا، قوی گوزونده گوزل له نیم

بو یئرلرین پاییزی لال، قیشی چولاق
بلکه باهار گتیره سن گولوشون له
دونوب چیچه ک قافیه لی قوشمالاریم
بلکه بیر بیر اریده سن گوروشون له

دئدین سئوگی اوزگه لری قوهوملادیر
بو شه هه ر ده قوهوملار دا یاد دی بئله
قوهوم قونشو سهل دیر کی بو شه هه ر ده
آتا، اوغول بیر بیرینی آتدی بئله

سئوگی دئدین جلاد لاری شاعیر ائلیر
بو شه هه رین شاعیرلری جلاد اولدو
جلادلارین بیلمه دیگی یولا حتی
قالدی قالدی بو شاعیرلر بلد اولدو

مایاسی بیر تبسسوم دور، تبسسوم ائت
جانا هوپسون، سئوگی دیللردن قوتولسون
جنازه دن خلاص اولان آغاجلار تک
گولومسه قوی جیب لر اللردن قوتولسون

مایاسی بیر تبسسوم دور، بو شه هه ری
آشیقلارین، شاعیرلرین الیندن آل
قوپوز گتیر، قلینج گتیر گولوشون له
تخته لرین دمیرلرین الیندن آل

مایاسی بیر تبسسوم دور، بو حیاتین
تبسسوم سوز حیات اولار؟ حیات اولماز
آنالارین بایاتی سی بایاتی یار
آما سنین تبسسومون بایات اولماز

مایاسی بیر تبسسوم دور، تبسسوم ائت
خراب قالیب، بو شه هه ری شه هه ر ائیله
بیز سئوگی نی سئودیک، آما باجارمادیق
بئله قویما، سن اوزون بیر ته هه ر ائیله
16/10/93 تبریز

هله ده فایتون دان، آتدان، کیشی دن
بونلارین جانیندا بیر گومان قالیب
شهری بولوبلر عنوانسیزلارا
بونلارا ساده جه بیر عنوان قالیب
کوچه لر ائولنیب ائو اولوبدولار
بو یازیق لار هله خیاوان قالیب
گلین ائولندیرک خیاوانلاری
****
ازلده شه هه رلر خیاوان ایدی
کوچه یه، باجایا سونرا دوندولر
هاردا اوجاق یاندی، قازان قئینه دی
بو یولسوز کوچه لر اورا دوندولر
اوزانیب اوزانیب شه هه ر بویوجا
قارالیب قارالیب، قیرا دوندولر
گلین ائولندیرک خیاوانلاری
****
گویلو آلچاق اولدو خیاوانلارین
ائولر عوضینده هر گون اوجالدی
میخانا یئرینده مچید تیکدیلر
یازیق خیاوانلار نه گونه قالدی
ساچین بویاسادا بلدیه لر
بیرگون باخارسیز کی بونلار قوجالدی
گلین ائولندیرک خیاوانلاری
****
دایانیب ایت لرله نفس نفسه
قاپی سین آچمامیش هله دوکانلار
هر زامان ائو اولوب، ائشیک اولوبدور،
بوتون ائوسیز لره بو خیاوانلار
اونلارین ائشیک سیز ائوسیز قالماسین
ائولی لر بیلمزکی، ائوسیز لر آنلار
گلین ائولندیرک خیاوانلاری
****
بیر بیر کوچه لره ائولره گیریب
بو خیاوانلارا قیز تاپمالی ییق
بوتون او قیزلارا خیاوان بویو
هله دئییلمه میش سوز تاپمالی ییق
بیز سئون قیزلاری اولار تاپیب لار
اولار سئون قیزی بیز تاپمالی ییق
گلین ائولندیرک خیاوانلاری
****
نه یه فیکیرلشیر؟ نه یی دوشونور؟
نه لر خیاوانین باشیندا کئچیر
اونون به یه ندیگی سئودیگی گوزل
هر گون خیاوانی ماشیندا کئچیر
قنوو دان قنووا الی یئتیشمیر
قنووولار گوزونون یاشیندا کئچیر
گلین ائولندیرک خیاوانلاری
****
اوجالسا ناله سی خیاوانلارین
بو هوندور بینالار قوم اولاجاقلار
تکر لر توز کیمی چورویه جک لر
ماشین لار ارییب موم اولاجاقلار
بو ائولر هر کیمین اولورسا اولسون
خیاوانسیز قالیب کیم اولاجاقلار
گلین ائولندیرک خیاوانلاری
****
کوچه نین کونلونو اله آلماغا
ناحاق خیاوانلار اوزونو یورور
هر کوچه باشیندا لوتو لار کیمی
ایندی هوندور هوندور بینالار دورور
خیاوانلار سوبای، بینالار ائولی
بیری مایوس باخیر، او بیری مغرور
گلین ائولندیرک خیاوانلاری
****
یئتر یولسوزلار لا ال بیر اولدونوز
بوتون یاماجلاری یول ائیله دینیز
نه آلدیز، نه ساتدیز دار کوچه لرده
شه هه ر لر قیز ایدی، دول ائیله دینیز
ایندی کی تالادیز خیاوانلاری
ساتدیز دوکان دوکان، پول ائیله دینیز
گلین ائولندیرک خیاوانلاری
****
بازار دوزلتدینیز، دوکان تیکدینیز
بو خیاوانلارین گوزونو ساتدیز
ده ده لی بابالی خیاوانلارین
آدینی ساخلادیز، اوزونو ساتدیز
قورخورام یوبانساق قیز تاپیلمایا
بئله کی شه هه رین قیزینی ساتدیز
گلین ائولندیرک خیاوانلاری
****
گلین هردن هردن ماشیندان دوشوب
بو خیاوانلارین نازینی چکه ک
بوتون بو ائولرده قیز یوخدورسادا
باری قوجاغینا بیر چینار اکه ک
ماشینی، آدامی سئون خیاوان
یقین چیناری دا گوروب سئوه جک
گلین ائولندیرک خیاوانلاری
5/10/93 - تبریز

هر شاعیر بیر واراق شعیر یازینجا

بیر داملا آغلاسا قورو چایلارا
چایلارین هامی سی دنیز اولاردی
یاندیرسا شئعرینین بیر واراغینی
هر شاعیر بیر واراق شئعیر یازینجا
گئجه لرین چوخو گوندوز اولاردی
****
خیردا بیر تئشه نی آلسا الینه
بوتون بو داغلاری قوم ائله میشدی
بیر اووج سو توکسه داشین اوستونه
هر شاعیر بیر واراق شئعیر یازینجا
سیلدیر قایالاری موم ائله میشدی
****
بیر شاعیر قدری درد آزالاردی
یاشایا بیلسئیدی اوز دئدیگینی
وطن ده نه قدر آج آزالاردی
هر شاعیر بیر واراق شئعیر یازینجا
اوزو قازانسایدی اوز یئدیگینی
****
بو یئرین اکه نی بیچه نی یوخدور
آچسا قوللارینی اوراق بویوجا
تورپاغین، تاخیلی آشیب داشاردی
هر شاعیر بیر واراق شئعیر یازینجا
اکسئیدی تورپاغی واراق بویوجا
****
قان توکن قلینج لار قیندا قالاردی
قلینج دان یازسئیدی قاش عوضینه
قان ایچن شاهلاری تخت دن سالاردی
هر شاعیر بیر واراق شئعیر یازینجا
قلمین آتسئیدی داش عوضینه
****
واراغا وئردیگین چوره یه وئرسه
دویاردی اوزوده، قوناقلاری دا
وئرسیدی واراغین معلیم لره
هر شاعیر بیر واراق شئعیر یازینجا
یازماق اویره نردی اوشاقلاری دا
****
بوراخسین دونیانین فیکیرین، خیالین
قوی اونسوز بو دونیا باتسین بیر گئجه
ال چکسین شه هه رین کوچه لریندن
هر شاعیر بیر واراق شئعیر یازینجا
گئتسین اوز ائوینده یاتسین بیر گئجه
****
سربست میصراع لاردا سویوندورماسین
بو یازیق میللتین گلینین قیزین
سویسون واراق واراق اوز پالتارینی
هر شاعیر بیر واراق شئعیر یازینجا
اوتورسون بیر واراق اوخوسون اوزون
****
سئویب یازمادیغی بیر قیز قالمادی
بیر آز خانیمینی قیزینی سئوسین
یئرلری گوی لری سئودییی یئتر
هر شاعیر بیر واراق شئعیر یازینجا
بیر واراق بویوجا اوزونو سئوسین
****
بلکه ده یازماسا او بیر واراغی
ایکی باش تانباکی آز یانا بیلر
قلمین ده ییشسه باشقا قلمه
هر شاعیر بیر واراق شئعیر یازینجا
باشقا بیر شاعیره داش یونا بیلر
****
سوکولن بو ائولر تیکیلمه لی دیر
گوره ن یئته جک می بو چینگیل بو داش؟
اولو فضولی نین روحوندان ایراق
هر شاعیر بیر واراق شئعیر یازینجا
یازان قلم بویدا داش اولئیدی کاش
****
بیزه مین ایللردی شعر اوخویورلار
باختیمیز یاریمچیق، عومروموز یاری
یورغونوق، باشیمیز، بئینیمیز آغریر
هر شاعیر بیر واراق شئعیر یازینجا
بیر واراق شعر قدر سوسایدی باری
****
4/10/93 - تبریز

منی بیر دومانا، داغا قوناق ائت
قوی دومانلی داغلار، گومانیم اولسون
بیر آخشام یئریمی شئه قوینوندا سر
قوی داغین دومانی یورغانیم اولسون
****
منیم قاباغیما بیر بایاتی کس
منیم قاباغیمدا بیر غزل اولدور
یادا منی آپار گول قاباغینا
بیر گول ایاغیندا بیر گوزل اولدور
****
سن آللاه قویونا قوزویا ده یمه
بوگون بال کس منه، قایماق کس منه
دورنا له له ییندن بیر قلم گتیر
چیچک یارپاغیندان واراق کس منه
****
بیر گون منی چاغیر کهلیک تویونا
سازیمی داغلارا داشلارا چالیم
قونشونون تویوندا چالمادیغیمی
کهلیگین تویوندا قوشلارا چالیم
****
بیر گون منی آپار گول بازارینا
بنوشه عطری نین نوبارین آلیم
نرگیزدن اوزومه کوینک بیچدیریم
قولاج یارپاغینین شالوارین آلیم
****
بیر آغاج کوتویو باشماغیم اولسون
دومان دری سیندن پاپاق تیکدیریم
قیزیل گول کولوندا بیر بوداق آلیم
اوزومه بیر کیچیک اوتاق تیکدیریم
****
منی قوناق ائله داشا، قایا یا
قوی اوز تاریخیمی داشدان اوخویوم
بلکه من اوزومو سهو آنلامیشام
اوزومو داشلاردا باشدان اوخویوم
****
منی حقیقته، حقه قوناق ائت
مجازلار الینده دیده لنمیشم
اوز باشیما اوچور اوزوم قوردوغوم
اوزوم، اوز الیم له هده لنمیشم
****
باخیرام مجازی پنجره لردن
دومانا، چیسگینه، توستویه بئله
دوشورم مجازی پنجره لرده
بورانا، سویوغا، ایستی یه بئله
****
مجازی باخیرام ایللر بویو دور
چیچه یه، گویچه یه، آداما حتی
مجازی باخیرام قونشو قیزینا
مجازی باخیرام آتاما حتی
****
نه واختسا چکدیگیم بیر جاوان شکیل
ایندی اوتوروبدور یئریمه منیم
حقیقت دوشوندن آرالاناندان
مجازدیر کی آخیر شعریمه منیم
****
الیم له، جیبیم له، صحبت ائلیرم
الیم له، جیبیم له قولاق آسیرام
اینانمازسان دئسم، داها گولمورم
گولمک ایسته ینده، دویمه باسیرام
****
آل مندن مجازی گولومجک لری
چیچک دوداغیندا گولوش وئر منه
اوراق وئر اوت بیچیم، خالوار داشی ییم
چوخداندیر بئکارام، بیر ایش وئر منه
****
ال لره، جیب لره پارچالانمیشام
توپلا منی داغین دستمالینا توک
بئزدیم نوه لرین کوچه لریندن
منی اوز بابامین ماحالینا توک
****
اوردا قازاندیغیم، عشقی ایلهامی
بوردا خرجله ییرم من واراق واراق
اوردا بوداق بوداق تاپدیغیم ذووقو
بوردا آختاریرام من یاتاق یاتاق
****
توپلا یاتاقلاردان ائولردن منی
ائلین سوروسویله یاتاغا قایتار
آنالیق ائتمه دی بو شهر منه
اوز آنام بوکدوگو قونداغا قایتار
****
قایتار آتام اوغلو داغلارا منی
داغلاردان بیر شیریم گوذار وئر منه
لاله یارپاغیندان کفنیمی بیچ
دره لر قوینوندا مزار وئر منه
4/10/93 - تبریز

یئنه خیالینا ال اوزاتمیشام

 

یئنه خیالینا ال اوزاتمیشام
گونلومدن گوزونه یول اوزاتمیشام
تئلیندن تانری یا تئل اوزاتمیشام
بو گئجه تانری لار تئلینه بنزیر
****
هارداسا بیر بوداق آدینی دئییب
هارداسا بیر یارپاق سه سینی دویوب
هارداسا بیر چیچک الینه ده ییب
چیچک لر هامی سی الینه بنزیر
****
گوزوندن گویلره گئتمه لی بلکه
گوزونون گولونده ایتمه لی بلکه
بوتون آری لاری گودمه لی بلکه
پتک لر هامی سی دیلینه بنزیر
****
سنسیز گئجه لرین کئچدی بیری ده
بلکه اوز خیالین منی کیریده
باخیرام شه هه رین کوچه لری ده
بیز گزن یئرلرین چولونه بنزیر
****
بو گئجه یئر گویو هامارلامیشام
آیی یواسیندا یووارلامیشام
یئنه خیالینی تومارلامیشام
اللریم ساچینین گولونه بنزیر
31/35/3 - تبریز

نئچه کیتاب اولوب یازمادیقلاریم

 

هر گون بیر ماراق لا، بیر آختاریش لا
یئری ییر، یورویور، عومور کروانی
بیر گون جانا گلیب، جاندان بئزیرم
بیر گون جان ایچینده ساخلیرام جانی
گزیب سئوه سئوه دره نی ، دوزو
گوروب یازا یازا، قوجا دونیانی
نئچه کیتاب اولوب یازمادیقلاریم
****
قوجالا قوجالا جوان دی دونیا
کوهنه له کوهنه له تزه دی عالم
آغلایا آغلایا، گولور گوزوموز
یادلانا یادلانا تانیشلانیر غم
دوزوب کلمه لری بیر بیر اوستونه
بیر کیتاب بویوجا یازسا دا قلم
نئچه کیتاب اولوب یازمادیقلاریم
****
بعضا قوهوم اولور، بعضا یاد اولور
اوگئی دوغماسی وار معنالارین دا
سوز اوز معناسی نین جانسیز قولودور
قول کیمی ساتیلیر سوز بازاریندا
شعریمین چوخونو آغا بوکموشم
قارا سیطیرلرین آرالاریندا
نئچه کیتاب اولوب یازمادیقلاریم
****
قایالار دا بیلمیر، داشلاردا بیلمیر
داشلارین قلبینه قازمادیغیمی
بیر اوزوم بیلیرم نه لر پوزموشام
سیز آنجاق گورورسوز پوزمادیغیمی
بوتون یازدیغیمی یاشامامیشام
اما یاشامیشام یازمادیغیمی
نئچه کیتاب اولوب یازمادیقلاریم
****
گاهدان سونبول کیمی دنه دولموشام
بیچن ال اولماییب، اوراق اولماییب
گاهدان پیرتلاشمیشام درویش لر کیمی
جانیمی دارایان داراق اولماییب
گاهدان دا بیر شئی لر یازماغیم گلیب
قلم تاپیلماییب ، واراق اولماییب
نئچه کیتاب اولوب یازمادیقلاریم
****
یازمادیقلاریم یوخ، اصلینده بلکه
یازانمادیقلاریم دئسم، دوز اولار
نئیله ییم، یاشانان یازی یا گلمیر
نئجه جانلی حیات، جانسیز سوز اولار؟
هر سویوق دئینده، سوزده اوشوسه
گور نه قدر کیتاب دونار، بوز اولار
*
نه اولسا یازی نی آدام یارادیب
کائینات کلمه نین قابینا دولمور
گول سوزو گول کیمی اوخونورسا دا
گول کیمی آچیلمیر، گول کیمی سولمور
بوتون حیاتیمی یازماق ایستیرم
یازماییرام اولمور، یازیرام اولمور
نئچه کیتاب اولوب یازمادیقلاریم
****
دویغودان یازیلان بوتون یازیلار
اصلینده دویغونون دوشونجه سی دیر
دویغو بیر آن اولور، بیر آن یاشانیر
یازیلان او آنین ترجمه سی دیر
هر سوز معناسینا خیانت ائیلیر
سوزلر اوزو بیلیر نه یین نه سی دیر
*
شاعیرلر مین ایل دیر درد دن یازیرلار
دردی یازمازلار کی دردی چکرلر
گوزو نئجه یازسان گوزه بنزه مز
یاشی یازمازلار کی گوزدن توکرلر
یازمادیقلاریمی بلکه بیر زامان
شاعیرلر گوتوروب سوزه بوکرلر
نئچه کیتاب اولوب یازمادیقلاریم
****
یازیلان کیتابلار یاشانماسادا
بیز یازدان یازیریق، یاز اولدو بلکه
نه واختسا نه بیلیم بیر داش اوستونه
بعضی یازمادیغیم قازیلدی بلکه
بیر زامان کیمین سه کیتابلاریندا
یازانمادیقلاریم یازیلدی بلکه
*
اوزو بیر دونیادیر یازمادیقلاریم
ابدی دونیانین ازلی بویدا
هله کی دونیادا یازدیقلاریم لا
اولموشام "یورغونون" غزلی بویدا
ائله بویوک بویوک یازمادیغیم وار
اینان هره سی بیر فضولی بویدا
نئچه کیتاب اولوب یازمادیقلاریم
31/35/3 - تبریز

بلکه ده اولولر بیزه آغلاییر

گوره ن هارا گئدیر باشینداکی لار
آداملار باشلارین یئره قویاندا؟
گوره سن داریخمیر مزار ایچینده
اوستونه داش توکوب، تورپاق یایاندا؟
باسیب باغریمیزا بیر مزار داشین
اولن اولولره بیز آغلایاندا
بلکه ده اولولر بیزه آغلاییر؟

****
دوداق چوروینده، اوز چوروینده
گورسن چورویور اوپوشلری ده؟
بیر داملا یاغ کیمی گوز ارییینده
گوره سن اریییر گوروشلری ده؟
کیم دئییر اولوم له اولور انسانین
آغلاماقلاری دا گولوش لری ده
*
هر گون قبرستاندا نه قدر دیری
نه قدر اولونون داشیندا گزیر
هله چوخ دیری لر آرزیلارینی
اولن اولولرین یاشیندا گزیر
فیکیر وئر! نه قدر اولو پاپاغی
نه قدر دیری نین باشیندا گزیر
بلکه ده اولولر بیزه آغلاییر
****
بلکه آغاج کیمی بیز بوی آتاندا
اونلار بویوموزو بوکولموش گورور؟
بیز تیکه ن ائولری بلکه ده اونلار
باخیر کرپیج کرپیج سوکولموش گورور؟
بلکه بو دونیادا اونلار دا بیزی
هئچ دیری بیلمه ییر، لاپ اولموش گورور؟
بلکه ده اولولر بیزه آغلاییر
****
باشیمیز دیشیمیز آغرییان زامان
تومار تئلیمیزی دارایان زامان
هردن بو حیات دا یاریمایاندا
هر دن ده حیات دا یارییان زامان
جانیمیز آغری دان چوروین زامان
گوزوموزون یاشی قورویان زامان
بلکه ده اولولر بیزه آغلاییر؟
****
بیز گورن بو دونیا اونلارا تانیش
اونلار گورن دونیا بیزلره یوخو
بلکه ده اولولر هر سحر آخشام
بیزی دیری گوروب آغلاییر چوخو
یاغیش اولولرین گوز یاشلاری دیر
هر یاغیش یاغاندا کیم بیلیر آخی؟
بلکه ده اولولر بیزه آغلاییر
****
اصلینده آغلاماق دیری نین کی دیر
هر زامان دولاندا گوز آغلاییریق
اویور اوره ییمیزی سوز آغلاییریق
تیتره ییر یوللاردا دیز آغلاییریق
کیم دئییر آغلایان گوز بیزیمکی دیر؟
بیز ائله بیلیریک بیز آغلاییریق
بلکه ده اولولر آغلاییر بیزه
****
بلکه ده اولولر اولندن سورا
بیزه حوکم ائدیرلر آللاه آدینا
بلکه دئییرلر بس هئچ اولمه ییب لر
هئچ کیمین اولدویو گلمیر یادینا
بیر سونسوز حیاتین یانقی سی ایله
یانان اوره ییمیزین باخیب اودونا
بلکه ده اولولر بیزه آغلاییر
****
تورپاغین آلتیندا ساندیقلاریمیز
گویلرین اوستونده پری دی بلکه
نه واختسا مزاردان اوزلری کوچوب
قالان اولولرین یئری دی بلکه
هله نه بیلیریق اولولر اولوب؟
بوتون بو اولن لر دیری دی بلکه؟
*
بلکه ده اولولر سورا دیریلیر
عنوانین گیزله ییر، آدین گیزله ییر
بلکه ده دیری لیک اولومدن باشلیر
اولولر بیر به بیر بیزی اوزله ییر
اولولر بیر داها اولمه یه جک لر
اما دیری لری اولوم گوزله ییر
بلکه ده اولولر بیزه آغلاییر
****
بلکه هئچ دیری لر دیری دئییل دیر
عومور دفترینده یاش توکور آنجاق
بلکه ده اولونو دیری دن سئچمیر
قبیر لر اوستونه داش توکور آنجاق
بلکه بیز اولنده قبریمیز اوسته
دیری لر آغلامیر، یاش توکور آنجاق
بلکه ده اولولر بیزه آغلاییر؟
****
اولولر دوغوردان اولموش اولسادا
دیری لرین یاخین سیرداشی اولور
هر کسین دونیادا دردین دئیه سی
اونا آغلایاسی بیر داشی اولور
هارداسا شهرین قبرستانیندا
هر کسین بیر قبیر یولداشی اولور
یقین کی اولولر بیزه آغلاییر
29/9/93 - تبریز

 

-------------------------------------------------

اوستاد سخاوت عزتی «عندلیب» ین بو شعره نظیره سی:

سئوگینی ، سئوینجی بوکوب غملره
حیات دا بیر گولوب یوز آغلایاندا
دیریلر اوستونه مرمیلر تؤکوب
اؤلولر دالینجا گؤز آغلایاندا
هر گون قوجاقلاییب قبیر داشلارین
یانیقلی – یانیقلی بیز آغلایاندا
بلکه ده اؤلولر بیزه گولورلر

دونیا شیرینلیر بیزه گون به گون
بو بال بارداغیندان دویان تاپیلماز
« دونیا وسفاسیزدیر ، عمرلر فانی »
دئین تاپیلسا دا دویان تاپیلماز
باخیب بؤرکوموزه بئله دئینده :
« بیر زامان سنی ده قویان تاپیلماز »
بلکه ده اؤلولر بیزه گولورلر

هله ده بیلمیریک بو نه دیر بئله
یارادیر مین دردی ، مین آهی بیزده
بیزیکمی ؟ دونیانین گوناه چئشمه سی
یا دونیا یارادیر گوناهی بیزده
حلالی ، حرامی قاتیشیق سالیب
گؤرنده یوونسیز طاماحی میزی
بلکه ده اؤلولر بیزه گولورلر

هاچانسا شئیطانین اوزونه گولوب
اوچور نفسیمیزین هاواسی اوچور
فلاکت دئوینین الینده اسیر
دونیانین سعادت بیناسی اوچور
هاچانسا انسانین توخانیب الی
بیر گوناهسیز قوشون یوواسی اوچور
سولار زهرلنیر نفسیمیزدن
مئشه دن مئشه لیک جلاسی اوچور
اوچوردوب بو قدر گؤزللیکلری
سونرا ماتم توتوب یاس ساخلایاندا
بلکه ده اؤلولر بیزه گولورلر

اؤلولر گولور اولاردان نییه
عبرت گؤتورمدیک ، مایا درمه دیک
اؤلولر گولورلر اولاردان قالان
داغیلمیش یوردلاری نییه گؤرمه دیک
یور مین حسرت ایله سؤیله ینده بیز
« دونیا گلشنینده صفا سؤرمه دیک »

نه یاخشی آداملار یاتیر گئجه لر

ملک­لر ساحاتین آیا کوکله­ییر
آداملار ساحاتین گونشه قورور
اونچون آداملار سحر دوراندا
معصوم ملک کیمی یوخودان دورور

اولدوزلار آدامین ال اوزون یویور
آی اوسته دوشه­ییر یورغان دوشه­یین
یوخو قانادینا مینیر، اونودور

حیاتین قامچی­سین، کین­ین، کوته­یین

گوندوز ملک­لره دئو اولان آدام
گئجه قوجاغینا گیریر مه­له­یین
نه یاخشی آداملار یاتیر گئجه لر

اویانیر، شه­هه­رین جانینا هوپور
اود کیمی چیرپینیر، آت کیمی چاپیر

بیری­نین اگنیندن پالتارین سویور

بیری­نین الیندن چوره­گین قاپیر
حیاتدا آختاریب تاپمادیغینی
گئجه لر رویادا، یوخودا تاپیر

حیات دینجلسه­ده آی ایشیقیندا
گونشدن قیزینیز آلووو، اودو

عصیرلر ائو تیکیب، ائو ییخان آدام
بیر گون دیلدن دوشوب یورولمازمی­دی؟
نه یاخشی آداملار یاتیر گئجه لر
 

گوندوزلر گئیسه­ده دئو پالتارینی
گئجه­لر سویونور، بیر اینسان اولور
حتی قودوز اوغلو قودوزلار بئله
یوخولایاندان سونرا مئهریبان اولور

گوندوز قان سالسا دا، گئجه­لر باری
محبتلی اولور یاتاق بویوجا
گوندوز مئشه - مئشه حیوانلاشسادا
گئجه اینسانلاشیر اوتاق بویوجا
نه یاخشی آداملار یاتیر گئجه لر
آداملار قارانلیق، آداملار ایشیق
یاری­سی ابلیس دیر، یاری­سی تانری
گوندوزلر آداما اوخشاماسا دا
گئجه­لر تانری­یا اوخشاییر باری

گاهدان هر نه­یی نی ساتیر آللاها
گاهدان دا هر نه­یینی ساتیر آللاهین
بوتون آداملارین ایکی قلبی وار
دورور تورپاغیندی، یاتیر آللاهین

آداملار قوهوموم، آداملار قونشوم
آداملار قارداشیم، آتام اولورلار
گوندوزلر دئو کیمی یاشاسالاردا
باری گئجه­لری آدام اولورلار
نه یاخشی آداملار یاتیر گئجه لر

یاتیرلار، قلم ده قول دا دینجه­لیر
آیاق دا دینجه­لیر، یولدا دینجه­لیر
نا یاخشی هامی­یا وئریلیب یوخو
آغا دینجه­لنده، قول­دا دینجه­لیر
نه یاخشی آداملار یاتیر گئجه لر
****
گئجه شاعیریندی، گئجه ایتین­دی
گئجه­لر شهری بونلار دولانیر
یئرده غریب گزن آدامسیزلارا
گئجه­لر گویلرده ایلهام پایلانیر
نه یاخشی آداملار یاتیر گئجه لر

او اوزو اویانیر، هر سحر چاغی
اویادیر، سئوگی­ده، طاماح­دا اونو
نه یاخشی هر گئجه او اوزو یاتیر
یوخسا یاتیردانماز آللاه دا اونو
نه یاخشی آداملار یاتیر گئجه لر

31/3/93 - تبریز

یاغیش یئری تمیزله میر

 

یئنه چولده یاغیش یاغیر
یاغیر بیلور دنه سی تک
داراقلانیر، واراقلانیر
بولاقلارین سینه سی تک
هر گون یوسا دا تورپاغی
بو تورپاغین نه نه سی تک
یاغیش یئری تمیزله میر
****
هره نین بیر چتیری وار
آداملاری ایسلادانمیر
قمه لر قیندا گیزله نیر
هئچ بیری سین پاسلادانمیر
نفرت جانلارا یاییلیب
دوشمانلاری دوستلادانمیر
یاغیش یئری تمیزله میر
****
بوردا یاغیش یاغان کیمی
هامی قاچیر اوتاغینا
سئومه ین لر ساریلیرلار
سئون لرین یاتاغینا
یاغیر یئره یاغمیر کی هئچ
یاغیش چیچک یارپاغینا
یاغیش یئری تمیزله میر
****
اوغرو اوغلو اوغورولار
چیخیر اوزگه زمی سینه
اوتورور اوز زمی سینده
باخیر اوزگه زمی سینه
یاغیشدا می اوغرو اولوب؟
یاغیر اوزگه زمیسینه
یاغیش یئری تمیزله میر
****
ساختا باخیش، یالان باخیش
یاغیر قودوز باخیشلاردان
ایری دوزو سئچمک اولمور
ایری اویرو ناخیش لاردان
هر کیشی بیر پاپاق آلتدا
دالدالانیر یاغیشلاردان
یاغیش یئری تمیزله میر
****
فاغیر هر گون فاغیرلاشیر
زلی له شیر هر گون زلی
باشقاسی نین جیب لریندن
چیخیر باشقاسی نین الی
کیمین باشینا توکولور
کیمین اوجاغینین کولو
یاغیش یئری تمیزله میر
****
نه قدر ائو سیز کیشی لر
کوچه لرده بوکولورلر
نه قدر کیشی سیز ائولر
کرپیج کرپیج سوکولورلر
آچیق گوزلر، آچیلمایان
قاپی لارا تیکیلیرلر
یاغیش یئری تمیزله میر
****
تمیزله یه بیلمیر یاغیش
جیب لرده کی پول لکه سین
آغالارین قاپیسیندا
قوللوغ ائدن قول لکه سین
ائوسیز ائوسیز، ائولی لره
اویناش اولان دول لکه سین
یاغیش یئری تمیزله میر
****
بیری آلیر، بیری ساتیر
بو بازاردا اوغور بئله
بیر آنادان بیر آتادان
آغا، نوکر دوغور بئله
تمیز اولمور بو یئر اوزو
عصیرلردیر یاغیر بئله
یاغیش یئری تمیزله میر
****
تمیزله میر یاغیش بیزی
بو چیرک قان دا داماردا دیر
بیر اوجو آنا بطنینده
بیر اوجو دا مزار دا دیر
یاغیش یئرین اوزون یویور
اوزده دئییل آستاردا دیر
یاغیش یئری تمیزله میر
****
یئرین بوینوندا غوسلو وار
آلتی مئیید اوستو اویناش
بیر بیریندن لکه له نیر
اوزاق قوهوم، یاخین یولداش
یئر بولونور قبیر قبیر
هر یئر دویوش، هر یئر ساواش
یاغیش یئری تمیزله میر
****
یئر کوره سین خیردالادی
میلیونچونون قپیک فیکری
سالاملاری ساختالاتدی
باغلاردا کی اریک فیکری
چوروتدو یئر کوره سینی
چوروک لرین چوروک فیکری
یاغیش یئری تمیزله میر
****
یئر اوزونه لکه دوشور
بایراق لارین کولگه سینده
یئر کیچیلیر، اولکه اولکه
سرحدلرین بولگه سینده
دیلنچی لر، دیلنیرلر
میلیونچولار اولکه سینده
یاغیش یئری تمیزله میر
****
آغ ائولرین قاباغیندا
گول اکن لر گولله ساتیر
شهیدلرین مزاریندا
یاش توکن لر گولله ساتیر
صولحون آنا یاساسینا
قول چکن لر گولله ساتیر
یاغیش یئری تمیزله میر
****
یئرین گوی له، گویده کی له
هله باشین قاتانلار وار
گوی دن گلیب یئر اوزونو
شوخوم لایان کوتانلار وار
هله ده جنتی بوردا
قاریج قاریج ساتانلار وار
یاغیش یئری تمیزله میر
****
اوخو یئرین ناغیلینی
کوهنه ناغیل کیمی اوخو
قارا دئولر یوواسی دیر
بوردا آغ ائولرین چوخو
بو قدر ده قبیر اولار؟
نئجه یوسون یاغیش آخی؟
یاغیش یئری تمیزله میر
****
بو یئر اوزو بیلیر آنجاق
نه قازاندیق نه لر یئدیک
قولاقلار لا نه ائشیدیب
دیلیمیزله نه لر دئدیک
نه واختسا اوزوموز بلکه
بو یئر اوزون تمیزله دیک
یاغیش یئری تمیزله میر
31/3/13 - تبریز

قونشوموزون باغچاسیندا

 

قونشوموزون باغچاسیندا
آغاج وار آدام گتیریر
یاناقلارین گول یارپاغی
گوزلرین بادام گتیریر
****
بو آغاجین آداملاری
یئکه لیب بیر آغاج اولور
نه اللری قابار چالیر
نه ده گوزلری آج اولر
سارای سالمیر، ائو دوزلتمیر
ائوی بو یال یاماج اولور
هر سحر شئه شرابیندان
یارپاغیندا جام گتیریر
قونشوموزون باغچاسیندا
آغاج وار آدام گتیریر
****
بو آغاجین آداملاری
یاغلی یئمیر، یاوان یئمیر
یاتیر یئرین قوجاغیندا
گویده گونش دن سود امیر
گولوش وئریر چیچک چیچک
گولوش لری منیم سه میر
قوجاق آچیر بوداق بوداق
اوزگه دئمیر، اوزوم دئمیر
باغرینا باسیر هامی نی
هامی یا سالام گتیریر
قونشوموزون باغچاسیندا
آغاج وار آدام گتیریر
****
بو آغاجین آداملاری
عومور لره عومور وئریر
قلم لره واراق اولور
اوجاقلارا کومور وئریر
وئردیگینی وئرمه میشدن
اونا بونا دئمیر وئریر
چیچک اولور، گویچک اولور
محبته امیر وئریر
دوداغا تام، گوزه گولوش
اوره یه ایلهام گتیریر
قونشوموزون باغچاسیندا
آغاج وار آدام گتیریر
****
بو آغاجین آداملاری
قوجالاندا ساز اولورلار
آشیقلارین قوجاغیندا
دوققوز تئللی قیز اولورلار
سئوگی یه دیل، عشقه قولاق
حقیقته گوز اولورلار
بوداقلاری اییلسه ده
اوره ک لری دوز اولور لار
اوره ک دولو نغمه لری
اوره ک لره کام گتیریر
قونشوموزون باغچاسیندا
آغاج وار آدام گتیریر
****
آغاجلار آدامین دوستو
قوهومو دور قارداشی دیر
قونشو قیزین سئون لرین
بو آغاجلار سیرداشی دیر
آغاج آدامین بئشیگی
آغاج آدامین داشی دیر
یاماجدا هر بیتن آغاج
بیر آدامین گوز یاشی دیر
آداملار آغاج بیتیریر
آغاج لار آدام یئتیریر
قونشوموزون باغچاسیندا
آغاج وار آدام گتیریر
31/3/13 - تبریز

حیات

 

هر کس بو دونیادا اوزون یاشاییر
هر کسین دونیادا اوز دونیاسی وار
هر قاپانان گوزون اوز خاطیره سی
هر آچیلان الین، اوز دوعاسی وار
****
یاشاییش دئدیگین بیر آن دیر! بیر آن
عومور قوجاغیندا کیچیلیر زامان
ایکی عدم ایچره یاشاییر اینسان
بیر گون دوغولماسی، بیر گون یاسی وار
****
حیات کامیل اوستا، انسانلار ناشی
بیر کارواندیر گئدیر اولومه قارشی
هر اینسان بیر مزار، بیر قبیر داشی
هر کسین بیر آغیر معماسی وار
****
اینسانلار بولونور قارایا، آغا
بیری نوکر دورور، بیری سی آغا
یاشاییر، قاییدیر یئنه تورپاغا
سانکی بیر بدن دیر، مین لباسی وار
****
اینسانلار گئدرگی، اینسانلیق مدام
آرزیلار محتشم، عومورلر ناکام
مین آرزیا، کاما، چاتسادا آدام
چاتمامیش مین آرزی، تمناسی وار
****
اینسان کورپو سالیر قوهومدان یادا
چاتدیریر مورادا، چاتیر مورادا
حاییف آز یاشاییر اینسان دونیادا
حاییف بو عومره کی انتهاسی وار
****
یاشاییش بیر دنیز، اینسان بیر گمی
باخیر، باخیشیندا سونسوزلوق غمی
حیاتدا چالیشیر قاریشقا کیمی
مزاردا چالیشان قاریشقاسی وار
****
اینسان تک لنسه ده هر آخشام چاغی
یئنه منیم سه ییر دره نی داغی
بوردا دانیشدیرسان هر بیر بوجاغی
یادیندا مین آنا اوخشاماسی وار
****
یازیلی بیر داش دیر هر اینسان یاشی
انسانلار قایانین، داشین، یولداشی
قایالار اینسانین اکیز قارداشی
هر اینسان قبری نین بیر قایاسی وار
****
اینسان قالماق اوچون اوخویور، یازیر
آدینی داغلاردا، داشلاردا قازیر
بو تورپاق اینسان لا قایناییر، قیزیر
اینسانسیز حیاتین نه معناسی وار؟
****
اینسان حرارت دیر، اینسان ایستی دیر
بیر یاخین اوجاق دیر، اوزاق توستو دور
حاییف! دوشرگه سی بیر یول اوستو دور
بو یولون آتلی سی، پیاداسی وار
****
اینسانا بنزه ییر، هر بیتن آغاج
اینسان سه سی وئریر، بوتون یال یاماج
بو عالم عشق اوچون اینسانا محتاج
اینسان اوره یینه یالوارماسی وار
****
حاق سه سی عالمه اینساندان یئتر
اینسانلار اولماسا، بو عالم بیتر
هر اینسان معجوزه، هر اینسان اثر
هر اینسان قلبی نین اوز اساسی وار
****
باشقاسی دونیادا سئومز سئویلمز
باشقاسی آغلاماز، باشقاسی گولمز
باشقا هئچ یارانمیش غم چکه بیلمز
تک اینسان قلبینده غم یوواسی وار
****
اینسانلار اصلینده اولومسوز اولور
بیر جاندان بوشالیر، بیر جانا دولور
بیری سی بیر یاندا ساچینی یولور
بیری نین قوجاقدا ناز بالاسی وار
****
اینسانلار اولمه ییر، اینسانلار سئچیر
ابدیت یولو اینساندان کئچیر
اصلینده اوشاغا نوه یه کوچور
اینسانین قوردوغو هر بیناسی وار
****
ده ده لر اولورلر، اوغوللار قالیر
باشلار تورپاق اولور، عاغیل لار قالیر
هر اینسان عومروندن ناغیل لار قالیر
هر ائلین مین مجنون مین لیلاسی وار
****
هر یاغیش شعری دیر بیر آغلار گوزون
هر گول گولوشو دور بیر گوزل قیزین
"یورغونون" آلمایین الیندن سازین
هله چالمادیغی مین هاواسی وار
31/3/11 - تبریز

بئز یئری قالیر

 

ووردوغو یارادان ساغالمامیشام
یانمیش اوره ییمده کوز یئری قالیر
کوره کده خاطیره، اوره کده اومود
حیات جیغیریندا ایز یئری قالیر
*****
انسان هارا قاچسا، اولسادا هاردا
اوره یی هاردادیر اوزوده اوردا
آداملار بیر بیره اوخشاسالار دا
هر کسین اوره کده اوز یئری قالیر
*****
انسان اوز بختینین یاری سی اولور
یاری سی اولانمیر، یاری سی اولور
او قیز باشقاسی نین قاری سی اولور
هله ده گوزومده قیز یئری قالیر
*****
آرالار سویویور، هاوالار دوشور
انسانلار قلبینی انسانلار دئشیر
اوزگه اوزگه له شیر، من لر من له شیر
من لر آراسیندا بیز یئری قالیر
*****
انسانلار نه واختسا بیر خیال اولور
نه واختسا او جانسیز خیال دا سولور
سوفره لر بوشالیر، سوفره لر دولور
چوره ک یئری قالیر، دوز یئری قالیر
*****
هله قیزیشمامیش قلم واراغا
هله اوتورمامیش نغمه دوداغا
سنی قئیته ریرلر آنا تورپاغا
سوسموش دوداقیندا سوز یئری قالیر
*****
انسانلیق قوپ قوجا، اینسان تپ تزه
انسان سئوگی اکیب دره یه دوزه
بیر دره دوشونده بیر سینیق کوزه
بیر بولاق باشیندا دیز یئری قالیر
*****
باخیرام، گوزومه قارانلیق قونور
قوپوز بارماغیمدا، الیمده دونور
او یاندا بیر اوستا قارا داش یونور
بویاندا بئش مئتیر بئز یئری قالیر
31/3/33 / تبریز

بی قرار اولماقدا دیر

 

رشته جان گون به گون آشفته وار اولماقدادیر
مرغ روحوم لحظه لحظه بی قرار اولماقدادیر
اختیاریم عقل دن ترک عنان ائتمکده دیر
امتثالیم عشقدان بی اختیار اولماقدادیر
عشق طوفانی ییخیب تعقیل و تدبیرین ائوین
خاطر ناپایداریم، پایدار اولماقدادیر
بیر ازیلمیش خاک تاکم، اربعین لر گورموشم
جان شوریده م شراب خوشگوار اولماقدادیر
حق منم، حق منده دیر، هو هو و حق حق سویله رم
باشقا بیر حلاجی عشقین سربه دار اولماقدادیر
دولدو خورشید جمالین جامینا، سئودا مئیین
جان، شب تاریک منطق دن خمار اولماقدادیر
یاندی رخت اعتباریم، رند و رسوا قیل منی
اعتباری دهر اوزو بی اعتبار اولماقدادیر
ثابت و سیار عالم زائر میخانه دیر
منده عشق ایله بیر ایز قویدوم، مدار اولماقدادیر
یورغونا مین ایل ناماز قیلدیر ولی گل بیر گئجه
بیر ایچیم مئی وئرکی دونیایه دچار اولماقدادیر
31/3/35 تبریز

کمان ابرو

 

اول کمان ابرو یئنه قاشیندا خنجر گزدیریر
یا بلا تیرین کمانیله برابر گزدیریر
تاب جعدینده نه چوخ ریحان و سوسن بسله ییب
سرو قدینده نه چوخ سرو و صنوبر گزدیریر
محو اولوب هندوستان، شیراز رونقدن دوشوب
اول شکرلب لبلرینده شهد و شکر گزدیریر
لطفو جنات نعیم دیر، قهری دیر نار جحیم
اعتدالیندا حساب روز محشر گزدیریر
گاه هاجر دیر کی قوربانگاهه قوربان گوندریر
گاه مریم دیر کی قوینوندا پیمبر گزدیریر
لبلری له جان وئریر، ابرولری له جان آلیر
بیر نگاه ایله ولی مین جان دیگر گزدیریر
باغلاییب زولف سیاهه روی زرد عاشقلرین
سانکی تاجردیر یانیندا کیسه زر گزدیریر
گاه گورورسن قاشلارین کیم رزم اوچون آماده دیر
گاه گورورسن گوزلرین کیم بزم و بستر گزدیریر
"یورغونا" سوز مولکو دستاویز وصل یار دیر
بزم دلبرده اودور دیوان و دفتر گزدیریر
31/3/3 تبریز

باش قیمتینه

 

سئوگی خاطیره لی اوره ک ساتیرام
اوره ک یئکه لیقدا داش قیمتینه
دوشونجه ساتیرام، بیلیک ساتیرام
دوشونوب، بیلمه ین باش قیمتینه
*****
عومرومو ساتیرام حیاتی دولو
عشقیمی ساتیرام بساطی دولو
موسیقی ساتیرام بایاتی دولو
دولو بیر اوره یین بوش قیمتینه
*****
هله آرزی لاریم بیر یاندا دورسون
کیم منی تیکیب کی کیمده اوچورسون
اووچولار ووراندا قوی منی وورسون
قانادی ساتیرام قوش قیمتینه
*****
چوخلو سئویلمه میش سئوه جه ییم وار
دوداقلار حجمی جه گوله جه ییم وار
هله آچیلمامیش یوز چیچه ییم وار
یازیمی ساتیرام قیش قیمتینه
*****
هر گون یاناغیمدان سئل ائیله سه ده
باغریمین باشینی گول ائیله سه ده
یاندیریب یاندیریب کول ائیله سه ده
گوزومو ساتیرام یاش قیمتینه
*****
سن کی ساتا بیلدین، ساتدین هر نه یی؟
سن جه نئچه اولار شاعیر اوره یی؟
سنین له یئدیگیم او دوز چوره یی
ساتیرام بیر یاوان آش قیمتینه
7/5/93 *****عید فطر/ تبریز

یاشاماق قورخوسو

 

کاساد دیر حیاتین کونول بازاری
کونلومون ماتاحی الیمده قالیب
اوغورسوز سئوگی لر قلبیمی اویوب
محبت شله سی بئلیمده قالیب
بو حیات صرف ائتمیر بیزه آ دوستلار
طاماحیم بیر سس سیز اولومده قالیب
"دوزو یاشاماقدان یامان قورخورام"
*****
کیم ساتدی؟ کیم آلدی؟ منی بیلمه دیم
گاه خئییر قوخودوم، گاه شره دوندوم
مین ایلین محبت، سئوگی اولوسون
قبیردن قورتلادان محشره دوندوم
من بیر آغاجیدیم سهو ائتمیرم سه
کیم منی قارغادی بشره دوندوم؟
"دوزو یاشاماقدان یامان قورخورام"
*****
یوزوم سوز یولداشلار، داوام سیز دوستلار
سایقی سیز سئوگی لر سیخیر جانیمی
سئوگی اویون اولوب، اوره گ اویونجاق
اویون اویونجاقلار یاخیر جانیمی
من قالا قوردوغوم قارلی زیروه لر
ییخیلیر، توکولور، ییخیر جانیمی
"دوزو یاشاماقدان یامان قورخورام"
*****
قویون قوناق اولوم سیزه آ دوستلار
اوزومه سون گولوش گوله نه قدر
حیاتین الینه وئرمه یین منی
منی دالدالایین اوله نه قدر
امانت ساخلایین شاعیر کونلومو
امانت صاحیبی آلانا قدر
"دوزو یاشاماقدان یامان قورخورام"
*****
سئومه یه باشلاسام من آی ایشیقین
مین ایل یاشاسام دا یاریمچیق قالار
سئوسه م بنوشه نی، قار چیچه یینی
نرگیس دوداق بوزر، یاسمن سولار
حیات یاشاماغا چوخ چوخ بویوک دور
منده ده بیر کیچیک، شاعیر قلبی وار
"دوزو یاشاماقدان یامان قورخورام"
5/4/93 *****صوفیان

قیسیر پنجره لر

 

اوره ییمین اودو گوزومده دونور
دیلیمده دولانمیر قلبیمدن اوتن
خیالین جالانیب خیلقت جانینا
یاناغین دیر چیچک، ساچین دیر چمن
آتام ائوینده ده غریبسه ییرم
تکجه قوجاغیندیر کونلومه وطن
چوروتدو عومرومو آیسیز گئجه لر
یئنه ده آی دوغمور پنجره لر دن
بوتون پنجره لر قیسیردیر یئنه
********
بیر گئجه گل منی آیا قوناق ائت
یا دا اولدوزلارین بیرینه چاغیر
اصلا اولدوزلاری توک دسمالینا
آیی اولدوزلارین یئرینه چاغیر
یا دا گل آیی دا، اولدوزلاری دا
"فرمانین" سازینا ، شعرینه چاغیر
اووف! نه لر دئییرم؟ نه دانیشیرام؟
سن یوخسان، گئجه دن سنسیزلیک یاغیر
بوتون پنجره لر قیسیردیر یئنه
********
منی تک بوراخما آی سیز گئجه لر
گل آپار قوی قوپوز اویره دیم آیا
منی اولدوزلارین بیرینه تاپشیر
اولدوز قوجاغیندان باخیم دونیایا
یادا کوره ییمه بیر اولدوز ساری
گونش دن حرارت داشییییم آیا
سازیمی گونشین بارماغیندان آس
اولدوزلار قوی منی آپارسین تویا
خیال سنین له گور هارانی گزیر؟
قارا پنجره لر چارچیواسیندان؟
بوتون پنجره لر قیسیردیر یئنه
********
منی تک بوراخما آی سیز گئجه لر
منی تک بوراخما، اوله رم اینان
آیلی گئجه ده ده تک قویما منی
منی تک بوراخما، هئچ واخت، هئچ زامان
یامان بو گونلرده کووره ک اولموشام
یئنه اوره ک قوشوم داریخیر یامان
گوزومو میخلاییب پنجره لره
بیر اوزون انتظار، بیر اوزاق گومان
بوتون پنجره لر قیسیردیر یئنه
3/4/93 صوفیان

منیم سه سیم

مین سه سیم وار بو دونیانین اوزونده

یارپاقلارین سه سی منیم سه سیم دیر

قایالارین آراسیندان سوزولن

بولاقلارین سه سی منیم سه سیم دیر

*****
بو حیاتا کورپه دئییب قول آچان
چیچک لرین اوره یینه یول آچان
قوجاغیندا مین بیر چیچک گول آچان
بوداقلارین سه سی منیم سه سیم دیر!
*****
عومور بویو بو حیاتا وار دئیه ن
آلما دئیه ن، هیوا دئیه ن، نار دئیه ن
دوخسان دوققوز یاشیندا دا یار دئیه ن
دوداقلارین سه سی منیم سه سیم دیر!
*****
گئجه بویو نه یاتان نه کیری ین
عومور بویو گونش دئییب یئری ین
بیر گئجه لیک ایشیق اوچون اری ین
چیراقلارین سه سی منیم سه سیم دیر!
*****
بوتون بو یئر کوره سینی یورد بیله ن
یئرین قیسیر قالماسینی درد بیله ن
اکیب بیچن کیشی لری مرد بیله ن
اوراقلارین سه سی منیم سه سیم دیر!
*****
یئر صحبتین، گوی ناله سین ائشیدن
یئرین - گویون حواله سین ائشیدن
عومرو بویو حاققین سه سین ائشیدن
قولاقلارین سه سی منیم سه سیم دیر!
*****
حاقسیزلیقا باغری باشی سوکولن
"یورغون" کیمی شاخ قامتی بوکولن
گئجه گوندوز گوزو یولا تیکیلن
اویاقلارین سه سی منیم سه سیم دیر!
31/1/0 جلفا

 

حیات

 

حیات بیزه بیر حاق می؟ مرحمت می؟ بیلمیرم،
حیات بیزه سئوینج می؟ اذیت می؟ بیلمیرم،
حیات بلکه سیناق دیر، ایمتحان دیر چوخونا
حیات بلکه یاز دولو ارمغان دیر چوخونا
-
آنجاق حیات یولوندا
هر کیمسه نین چاتاجاغی دیله یی، آرزی سی وار
هر کیم اوز قدرینجه، چکدیگی آغری سی وار.
یوز فلسفه یازسادا اینسان حیاتی اوچون
حیات اینسان اوغلونون یگانه قازانجی دیر کائنات سوفره سینده ن.
حیات یگانه فورصت، یگانه شانسیمیزدیر عومور چرچیوه سینده،
هر شئی حیاتدان دوغور، حیاتدان تاپیر حیات؛
وطن،
سئوگی،
اوغول، قیز،
حقیقت، اولومسوزلوک، صداقت، غورور،اینام
جتی اولوم ده حیاتدان وارلیق تاپیر.
-
بیزلره حیات وئره ن کائناتا نئینه مه ک؟
حیات دولو حیاتی بیز نئجه سئویندیره ک؟
هر کیم حیات بورجونو وئرمه ده دیر بیر ته هه ر،
بیری دوغویا دوغرو، بیری باتی یا ساری
بیری سرت، بیری یومشاق
منجه حیاتا حورمت، کائیناتا احترام
حیاتی حیات کیمی یاشاماق دیر یاشاماق.
9/1/93 تبریز