حیات اوتوب کئچیر، نه سه بیر ته هه ر
جیغیرلار ساخلامیر هئچ کیمین ایزین

اوزگه نی اوزونده آختاران انسان
واخت اولور اوزگه ده آختاریر اوزون

نه اولار هئچ منی به یه نمه سه ده
بعضا کدرله نیب او خومار گوزون
چاغلاییب دولاندا، خاطیرلا منی!

بیر یاندان بوشالیر بیر یاندان دولور
قالسادا قالانلار خاطیره لردی

حیات اوزل اولمور انسان اوغلونا
اما اوزل لشیر هر کیمین دردی

کونلونون شهرینه باسقین ائیله ییب
کدر دسته دسته توکنده اوردو
آیاقدان سالاندا خاطیرلا منی

گئدرگی دونیادیر، آمانسیز حیات
چالیر یاس آغیسی، توی هاواسینی

نه واخسا قاپانیر آچیلان اللر
هر کسه قئیته ریر اوز دوعاسینی

هارداسا گورنده بیر ناشی قوزقون
ییخیب بیر توراجین یورد یوواسینی
قانادین یولاندا خاطیرلا منی

نه یینه قارغاییم گئجه گوندوزون؟
یاراسی قارادیر یاریسی ایشیق

قیسمت آغیزلاردا دیدرگین دوشور
دال با دال بوشالیر هر دولان قاشیق

گئت! اونوت هر نه یی، اما هارداسا
هردن بیر مجلس ده بیر جوان عاشیق
روحانی چالاندا خاطیرلا منی
25/7/95

سندن اومود گوزله میرم

سنین اوزونه ده بئله

اومود، اینام وئرن گلسین

سنین اوزونو ده بئله

اومود، اینام دیوارینا هورن گلسین

سندن اومود گوزله میرم

سندن

بیر گون باتان چاغی

گوزومون ایچینه باخیب

اعتناسیز دئیه جه یین

"منی اونوت" گوزله ییرم!

سندن اومود گوزله میرم

اونوت اومود اومدوغومو!

اونوت قارشیندا ال آچیب

گوزلریمی یومدوغومو

اونوت سنه سیغیندیغیم، او پناه سیز گئجه لری

اونوت او عشقدان دولو

او گوناهسیز گئجه لری

 

هر سحر  دوغان گونش دن

باشیما یاغان یاغیشدان

گویده آخان اولدوزلاردان

یئرده باخان بو گوزلردن

شلاله دن

داغدان

داشدان

بیر بئله یاردان یولداشدان

بیر بئله دوستدان قارداشدان

اومود آلانمیرام سا من

سن منه نئجه اومود وئررسن؟

یوخ

وئرسن ده

"سن منی اونوت" وئررسن.

🌾قاپیندا بیر آغاج اولسام🌾

 

قاپيندا بير آغاج اوسته بوداق اولسام

يئتر منه

قاپيندا بير بوداق اوسته ياپراق اولسام

يئتر منه

قاپيندا کی توپراق اولسام يئتر منه

 

من دئميرم مني آپار اوزون له بير دوستون كيمي

من دئميرم مني آپار يارين كيمي

 

اما سندن هئچ نه بلكه اكسيك اولماز

جیب لرینده

مني آليب آپارسان بير شكيل كيمي

اللرینده

مني هردرن واراقلاسان كيتاب كيمي

گوزلرینده

منی هر دن دوشورسن بیر خیال کیمی

قولاغیندا

مني هردن ائشيتسن بير نيسگيل كيمي

 

گوز به به يين اولماسام دا

باری قوی گوز ياشين اولوم

یار يولداشين اولماسام دا

باری قوی سير داشين اولوم

آنان باجين اولماسام دا

باری قوی قارداشین اولوم

باری قوی دام دوواریندا

بیر چینقیل بیر داشین اولوم

 

سن یئنیرسن

من قالخیرام

بو حیاتین جیغیریندا

سنه گل گل دئين حيات

قاچ گئت دئيير ايندي منه

سن بوی آتیب سونبول کیمی

زمی لرده اویناییرسان

من ایسه یاز قاری کیمی

اری ییرم گوندن گونه

اوجقار، غریب بیر مئشه ده

بیر بولاغین سینه سینده

يئنه ده بير غريب قوشام

غريبم، يالقيزام يئنه

من اوزومو بو ايللرده

سيناميشام دونه دونه

اودو سونمز بير الووام

بير آز آشيق

بير آز شاعير

بير آزجا دا دلي سووام

سندن يووا گوزله ميرم

درد ائوي دير منيم يووام

دينله مني هردن هردن آشيق كيمي

دلي كيمي

باخ بو غريب حال لاريما

چوخدان اولموش، چوروموش بير اولو كيمي

هردن ائشیت ناله دولو فغانيمي

روزگارين حزين اسه ن يئلي كيمي

عارسیزلارین

کارسیزلارین

دردسیزلرین توفاغینا

سوور مني

خان كرمين خان اصلی نین كولو كيمي

هردن سنه ال اوزاتسام

قاچما مندن

الیمدن توت

الیمی سیخ

سيخ بشرين

سيخ بنده نين

سيخ مه له يين

سيخ فه له یین

سيخ تانری نین الي كيمي

 

🌾حالیم یاخشی دئییل، باغیشلا منی🌾

 

حالیم یاخشی دئییل، باغیشلا منی

نه بیلیم، بو حالدا یاخشی دی بلکه

حالیم یاخشی دئییل، اما نه بیلیم

بو حال دا حال لارین باشی دی بلکه

 

بیر آن اوره ییمدن بوشالمیر آدین

بو نئجه عنوان دیر، بو نئجه آد دیر؟

آدینین هر حرفی بیر دلی کولک

آدینین هر حرفی آتش دیر، اود دور

 

سنین هر باخیشین بیر ساز هاواسی

بیر کوهنه قیفیل بند، بیر تازا داستان

بو سئوگی حالال دیر دوغمادیر منه

یوز دوغما قارداش دان، مین کوهنه دوستدان

 

سن هئچ منیم اوچون ائو تیکمه سن ده

ائویمی ییخدیقین منیم بسیم دیر

بیر ائودن قورتولوب، مین ائو اولموشام

بوتون ائولرده کی منیم سسیم دیر

 

سن هئچ منیم اوچون ائو اولماسان دا

منی ائو ائشیک دن بوراخدین گولوم

قوشو قفسیندن بوراخان کیمی

جانی نفسیندن بوراخان کیمی

🌾نئجه اوز دریمه سیغمیشام گولوم؟🌾

 

بیر اوتاق ایچینده مین یاتاق ایتیر

بیر بوداق بیر ساحات ساخلامیر بارین

بیر دره دوشونده مین عومور بیتیر

بو بویدا عالمین کهکشانلارین

من نئجه گوزوندن ساغمیشام گولوم؟

 

مین کندی سئل باسیر بیر چای داشاندا

بیر بولاق بویودور چینارین یوزون

خیالیم سنین له قوجاقلاشاندا

بوتون بو عالمین سویون، دنیزین

نئجه گوزلریمده بوغموشام گولوم؟

 

تضادلار ایچینده یورویور حیات

بولود آغلایاندا چیچک لر گولور

بیر کولک اسنده مین بوداق سینیر

بیر یاغیش یاغاندا یوز بولود اولور

من نئجه بیر عومور یاغمیشام گولوم؟

 

شهرلر یاپیلیر بیر داغ دوشونده

دوغولور گونش ده بیر داغ باشیندان

یوز کندین، شه هه رین بیر داغ بسی دیر

بو قدر داغلاری بیر گوز یاشیندان

من نئجه هر گئجه دوغموشام گولوم

 

خئییردن چیخمیشام، شر دن چیخمیشام

خئییره سیغمیرام، شره سیغمیرام

بو گویلر، بو یئرلر منه دار گلیر

گویلره سیغمیرام، یئره سیغمیرام

نئجه اوز دریمه سیغمیشام گولوم؟